AVF prezidenti iclas keçirib

30.05.2024 - 23:14

Voleybol yığmalarımızın Qızıl Avropa Liqasındakı çıxışı ilə bağlı iclas keçirilib.

Apasport.az xəbər verir ki, Azərbaycan Voleybol Federasiyasının (AVF) prezidenti Şahin Bağırov iştirakı ilə keçirilən toplantıda Bakıda qadın voleybolçular arasında keçiriləcək Qızıl Avropa Liqasının 3-cü mərhələsinə hazırlıq müzakirə olunub.

GİN-in Voleybol Mərkəzində baş tutan toplantıda AVF-nin vitse-prezidenti Bəhruz Quliyev, qadın voleybolçulardan ibarət millimizin baş məşqçisi və vitse-prezident Faiq Qarayev, baş katib Faiq Orucov və federasiyanın digər əməkdaşları iştirak ediblər.
Görüşdə qadın və kişi voleybolçulardan ibarət yığma komandalarımızın Qızıl Avropa Liqasındakı çıxışları müzakirə olunub.

Sonra Faiq Orucov sabah Bakıda start götürəcək Qızıl Avropa Liqasının 3-cü tur oyunlarına hazırlıqla bağlı məlumat verib. Milli komandamızın baş məşqçisi Faiq Qarayev voleybolçularımızın Xorvatiya və Rumıniyada keçirilən ilk iki turdakı oyunları haqqında ətraflı məlumat verib. Bildirib ki, komandamız bu qarşılaşmalarda müəyyən səbəblərdən istənilən kimi çıxış edə bilmədi. Bununla belə, Bakıdakı oyunlara daha böyük əhval-ruhiyyə ilə hazırlaşan voleybolçularımızın doğma meydanda qələbə qazanmaq üçün əllərindən gələni edəcəklərini deyib. F.Qarayev hazırda millidə olmayan təcrübəli oyunçuların da heyətə cəlb olunması, yayda və qış aylarında turnirlərdə iştirak etmələrinin vacibliyini vurğulayıb.

İclasda çıxış edən AVF prezidenti Şahin Bağırov bildirib ki, Faiq Qarayevin millimizin baş məşqçisi olması komandada çıxış edən və yaxın gələcəkdə cəlb olunacaq gənc oyunçular üçün böyük üstünlükdür. Onun təcrübəsindən yararlanaraq professional karyeralarında daha da uğurlu ola biləcəklər. Hazırda heyətdə olan gənclərin 2026-cı il qitə birinciliyinə daha yaxşı hazırlaşmaq üçün imkan qazandıqlarını söyləyib. Federasiya rəhbəri Estoniya və Avstriya yığmaları ilə qarşılaşmalarda komandamıza uğurlar arzulayıb, bu oyunlarda qalib gələcəyinə əminliyini bildirib.

Qeyd edək ki, qadın voleybolçularımız 4 oyundan sonra 1 qələbə qazanıb, 3 oyunda uduzublar. Kişilərdən ibarət yığmamız isə keçirdiyi 4 görüşdə də məğlub olub.