Bu gün Serbiyanın paytaxtı güləş üzrə dünya çempionatı start götürüb.

Apasport.az saytının məlumatına görə, ilk yarış günündə yunan-Roma güləşi üzrə millinin 3 üzvü mübarizəyə qoşulub. Onlardan ikisi finala yüksəlib. 

Eldəniz Əzizli (55 kq) 1/8 finalda italiyalı Covanni Freniyə ilk hissədə tam üstünlüklə qalib gəlib - 8:0. Dünya və Avropa çempionu 1/4 finalda yaponiyalı Şiotani Yuya da aman verməyib - 10:0. Eldəniz yarımfinalda amerikalı Maks Nouriyə heç bir şans tanımayıb. Rəqibini 9:0 hesabıyla xalçadan məyus yola salan Əzizli 4 illik fasilədən sonra finala yüksəlib. Titullu güləşçimiz həlledici görüşdə son Avropa çempionatının finalında məğlub etdiyi gürcüstanlı Nuqzari Tsurtsumiayla qarşılaşacaq.

İkinci mərhələdən mübarizəyə qoşulan Ülvü Qənizadə (72 kq) qazaxıstanlı İbrahim Məhəmmədovu 4:2 hesabıyla üstələyib. Qənizadə 1/4 finalda bolqarıstanlı Deyvid Dimitrovu vaxtından əvvəl məğlub edib - 10:0. Ülvü yarımfinalda türkiyəli Selçuk Canla olduqca gərgin görüş keçirib. Yekunda rəqibinə 4:3 hesabıyla qalib gələn güləşçimiz adını finala yazdırıb. Qənizadə həlledici görüşdə serbiyalı Ali Arsalanla üz-üzə gələcək.

Sənan Süleymanov (77 kq) isə ilk mərhələdə almaniyalı İdris İbayevlə qarşılaşıb. Keçən il 23 yaşadək güləşçilər arasında dünya çempionu olmuş rəqiblə görüş gərgin mübarizə şəraitində keçib. Süleymanov rəqibinə minimal fərqlə (7:8) məğlub olub.

Qeyd edək ki, bu çəkilərdə medal görüşləri sentyabrın 11-də Bakı vaxtı ilə 20:00-da başlayacaq.

• Azərbaycanlı qadın şahmatçı Ermənistan təmsilçisinə qalib gəldi
• Zədə danışıqları təxirə salıb
• “Fənərbaxçanın” futbolçuları Avropanın zirvəsində
• Şimal KUPONU
• İki oyunluq KUPON