“Qarabağ”ın oyununa görə Bakı metropolitenində iş rejimi gücləndiriləcək
27.08.2024 - 20:18
“Qarabağ”ın oyununa görə Bakı metropolitenində iş rejimi gücləndiriləcək

Bakı metropoliteni “Qarabağ”ın Çempionlar Liqasının pley-off mərhələsi çərçivəsində Tofiq Bəhramov adına Respublika stadionunda keçirəcəyi oyunla əlaqədar arenanın yaxınlığında yerləşən “Gənclik” stansiyasında dəyişdirilmiş iş rejimində çalışacaq.

Apasport.az xəbər verir ki, bununla bağlı "Bakı Metropoliteni" QSC-nin mətbuat xidməti məlumat yayıb.

Bildirilib ki, kütləvi tədbirlərlə əlaqədar əməliyyat planına uyğun olaraq, stansiya gücləndirilmiş rejimdə fəaliyyət göstərəcək. Saat 20:45-də başlanacaq matça tamaşaçı marağı, sərnişinlərin təhlükəsiz və rahat daşınması nəzərə alınaraq, əlavə tədbirlər də görüləcək.

“Gənclik” stansiyasında nəzarət mexanizmləri gücləndiriləcək və növbətçilik cədvəli tərtib olunacaq. Stansiyada sərnişinlərin yönləndirilməsi, səmti daha rahat müəyyən etməsi məqsədilə əlavə işçi qüvvəsi ayrılacaq.

“Nərimanov” və “28 May” stansiyalarında da ehtiyat tədbirlər nəzərdə tutulacaq. Qatarlar gün ərzində yay qrafikinin iş günləri cədvəlinə uyğun hərəkət edəcək. Ehtiyac yaranarsa, ehtiyat qatarlar xəttə buraxılacaq.

Qatarların hərəkəti qarşılaşma başa çatandan sonra məhz “Gənclik” stansiyasının iş rejimi nəzərə alınmaqla xüsusi qaydada tənzimlənəcək.

Qeyd edək ki, “Qarabağ” pley-offun cavab oyunları çərçivəsində Xorvatiyanın “Dinamo” klubunu qəbul edəcək. Zaqreb təmsilçisi ilə görüş sabah olacaq.

writer photo
Əlirza Əlirzalı
0