“Səhvimi başa düşürəm. Etdiyim hərəkət peşəkar futbolçuya yaraşan hərəkət deyildi, bunu anlayıram”.
Apasport.az saytının məlumatına görə, bunu “Neftçi-2”nin futbolçusu Rüfət Abbasov deyib.
O, klubun rəsmi saytına açıqlama verib. Əvəzedicilər Liqasının 3-cü turu çərçivəsində avqustun 21-də “ASK Arena”da keçirilmiş “Sabah-2” – “Neftçi-2” oyununun 90+4-cü dəqiqəsində rəqib futbolçunu qəsdən vuraraq meydandan kənarlaşdırılan müdafiəçi kobud hərəkətinə görə üzrxahlığını bildirib: “Matçın son dəqiqələri idi, məğlub olurduq, üstəlik, oyunum da alınmırdı. Bu səbəbdən gərgin idim və həmin an əsəblərimi cilovlaya bilmədim. Bütün komanda yoldaşlarımdan, məşqçi heyətimizdən, rəqib komandadan və şəxsən Səbuhi Qurbanovdan etdiyim hərəkətə görə üzr istəyirəm. Oyundan sonra Səbuhi ilə şəxsən görüşdüm və üzrxahlığımı bildirdim. “Neftçi”nin əsas heyətinə dəvət olunan futbolçunun bu cür hərəkətə yol verməməli olduğunu başa düşürəm. Gələcəkdə bu cür halların bir daha təkrarlanmamasına çalışacağam”.
Qeyd edək ki, “Neftçi-2” bu görüşdə 0:1 hesabı ilə uduzub.
Oxşar xəbərlər
Ana səhifə
Bütün xəbərlər
Hesabım