Dünya Çempionatı tarixi boyunca unudulmaz anlar və qollar futbol dünyasında böyük izlər buraxmışdır. Bu anlar təkcə qələbə ilə deyil, həm də dramatik və gözlənilməz hadisələrlə yadda qalır. Bu anlar futbolsevərlərin yaddaşında əbədi olaraq qalan və Dünya Çempionatı tarixində xüsusi yer tutan hadisələrdir. Hər bir çempionat öz qəhrəmanlarını, dramatik anlarını yaradıb və futbol tarixini zənginləşdirib:
1. Dieqo Maradonanın "Tanrı Əli" və "Əsrin Qolu" (1986)
1986-cı il Dünya Çempionatı Dieqo Maradonanın "Tanrı əli" və "Əsrin qolu" ilə əfsanəyə çevrildi. Maradona İngiltərə ilə oynanan 1/4 final matçında əvvəlcə topu əli ilə qapıdan keçirdi. Hakimlər qolu saydılar və daha sonra Maradonanın bu hərəkəti "Tanrının əli" adı ilə məşhurlaşdı. Eyni matçda Maradona meydanın öz yarısından topu alaraq 60 metr qaçıb beş İngiltərə oyunçusunu keçərək qapıya göndərdi və bu qol "Əsrin qolu" olaraq futbol tarixində əfsanəyə çevrildi.
2. Zinədin Zidanın Baş Zərbəsi (2006)
2006-cı il Dünya Çempionatı finalında Fransa ilə İtaliya arasında keçirilən matçda Zinədin Zidan Marko Materazzi ilə gərginlik yaşadı. Materazzinin provokasiyası nəticəsində Zidan ona baş zərbəsi vurdu və qırmızı kartla oyundan kənarlaşdırıldı. Bu, Zidanın son matçı oldu və Fransa komandasının məğlubiyyətinə gətirib çıxardı. İtaliya penaltilər seriyasında qalib gəldi və çempion oldu.
3. Pelenin Parlaq Debütü (1958)
1958-ci il Dünya Çempionatı Pelenin dünya səhnəsinə çıxdığı turnir oldu. İsveçdə keçirilən bu turnirdə cəmi 17 yaşında olan Pele finalda İsveçin qapısına iki qol vurdu və Braziliyanın ilk Dünya Çempionluğunu qazanmasına kömək etdi. Bu qələbə Pelenin karyerasının başlanğıcı oldu və onu dünya futbolunun ən böyük ulduzlarından birinə çevirdi.
4. Geoff Hörstün Tarixi Het-triki (1966)
1966-cı ildə İngiltərədə keçirilən Dünya Çempionatı finalında İngiltərə ilə Qərbi Almaniya qarşı-qarşıya gəldi. Geoff Hörst bu matçda tarixi bir het-trik edərək İngiltərəyə ilk və indiyə qədər yeganə Dünya Çempionluğunu qazandırdı. Hörstün vurduğu üçüncü qol topun qapı xəttini keçib-keçmədiyi barədə mübahisələrə səbəb oldu, lakin həmyerlimiz Tofiq Bəhramovun təkidi ilə hakim qolu verdi və İngiltərə matçı 4-2 hesabı ilə qazandı.
5. Andres İnyestanın Qolu (2010)
2010-cu il Dünya Çempionatı Cənubi Afrikada keçirildi və İspaniya ilə Hollandiya arasında dramatik bir finala şahid oldu. Andres İnyesta əlavə vaxtda vurduğu qol ilə İspaniyaya tarixində ilk dəfə Dünya Çempionluğu qazandırdı.
6. Roberto Baccionun Penaltisi (1994)
1994-cü il Dünya Çempionatı finalı ABŞ-da keçirildi və Braziliya ilə İtaliya arasında baş tutdu. Penaltilər seriyasına qədər uzanan bu matçda Roberto Baccionun sonuncu penalti zərbəsi qeyri dəqiq alındı. Nəticədə Braziliya qalib elan olundu. Bu, Baccionun karyerasında unudulmaz bir məqam oldu, çünki o, İtaliyanı çempionluğa apara bilmədi. Bu an həm onun, həm də İtaliya futbolunun tarixinə kədərli notlarla yazıldı.
7. Mario Götzenin Qolu (2014)
Braziliyada keçirilən 2014-cü il Dünya Çempionatının finalı Almaniya ilə Argentina arasında oynandı. Mario Götzenin əlavə vaxtda vurduğu qol Almaniyaya dördüncü Dünya Çempionluğunu qazandırdı. Götzenin qolu alman futbolu və azarkeşlərinin yaddaşına əbədi həkk olundu.
Oxşar xəbərlər
Ana səhifə
Bütün xəbərlər
Hesabım