Çempionun Götze arzusu

31.05.2022 - 22:23

PSV-nin yarımmüdafiəçisi Mario Götze İtaliyaya köçə bilər.

Apasport.az saytının məlumatına görə, 30 yaşlı futbolçunun xidmətində “Milan” maraqlıdır.

İtaliya çempionunun nümayəndələri Almaniya millisinin sabiq üzvünün meneceri ilə danışıqlar aparır. Götzeni əvvəllər PSV-yə rəhbərlik edən, hazırda “Benfika”nın sükanı arxasında olan Roce Şmidt də sərəncamında görmək niyyətindədir.

Pleymeykerin Niderland təmsilçisi ilə müqavilə müddəti 2024-cü ilə qədərdir. Onun transferi təxminən 4-5 milyon avro məbləğində təzminat tələb edir.

Qeyd edək ki, Mario Götze ötən mövsüm çempionatın 29 oyununda 4 qol vurub, 4 məhsuldar ötürmə verib.