Vaqif Cavadov 2-ci məktubu da açdı – İndi növbə sənindi haa...

28.02.2025 - 13:17

Ustadların yaratdığı obrazlar ölümsüzdür də. Allah rəhmət eləsin Məlik Dadaşova, Adil İskəndərova. “Axırıncı aşırım”dan dialoqları yadıma düşdü. Qəmlo Kərbəlayi İsmayıla necə deyir?

“Gəldim, səni xəbərdar eləyim. İndi növbə sənindi haa, Kərbəlayi...”

Girməyək təzədən statistikaya, ürəyiniz sıxılmasın rəqəmlərin içində. Hə, Vaqif Cavadovun “Sumqayıt”ı 10 oyundur ki, 1 qol belə vura bilmir. Dəhşətdir. 4 qolla qucaqladıqları kubokla da “4 qol”la salam-sağolu kəsdilər.

Məktub hekayəsini sizə danışmışdım, oxumayanlar bir də nəzər yetirsin (elə burdan).

Bəli, vədə yetişdi, “Sabah”la kubok matçından sonra baş tutan mətbuat konfransında Vaqif Cavadov 2-ci məktubu da açdı. Baxmayaraq ki, aylardır inadla çəkməcəni açmırdı, məktubun üstünü day toz basmışdı. Hər məğlubiyyətdən sonra futbolçularından razı qaldığını təkidlə vurğulayan Cavadov, dünən 2-ci məktubun qırağından cırdı, başladı oxumağa.

”Bu qədər oyundur qol vura bilmiriksə, deməli futbolçularımızda klas, ustalıq səviyyəsi, keyfiyyət çatışmır”. Cavadovun bu sözləri nə mətbuatda geniş yazıldı, nə də üstündə çox duruldu. Amma qardaşınız verdiyi sualın cavabında baş məşqçidən bu sözləri eşitdi. Yəni, 2-ci məktubdakı məsləhətləri: “Yanındakıları günahlandır”.

1-ci məktubda yazılan “keçmişi günahlandır” məsləhətinə aylar əvvəl əməl etmişdi Vaqif müəllim. Samir Abasovdan təhvil aldığı komandanın fiziki yetərsiz olduğunu deyib 3 ay qazanan Cavadov dünən etibarilə 2-ci məktubu da beləcə açmış oldu...

Həmkarlarımız arasında belə bir ifadə populyardır. Hansı komanda o həftə “Qarabağ”a qarşı oynayırsa, həmin komanda haqda “bu həftə turu boş keçir” deyə zarafat var. Yəni onsuz da, “Qarabağ“ udacaq” mənasında işlənir. İnsafla danışsaq, Vaqif neyləsin, “Qarabağ”la matçda onsuz da “Sumqayıt” turu boş keçəcək. Gəlin, bu oyunda da gənc məşqçiyə şans verək. Amma “Kəpəz”lə matçda da qazanılmayacaq 3 xala görə... Həəə, onda artıq çox təəssüf ki, Cavadov son məktubu da açmalı olacaq.

Gəldim, səni xəbərdar eləyim. 3 məktub yazma növbəsi sənə çatır haa, Cavadov...