Naxçıvan. C.Qurbanoğlu - APA. Naxçıvan Dövlət Universiteti (NDU) ölkənin ali təhsil ocaqlarının komandaları arasında keçirilən futbol üzrə universiadanın qalibi olub. Təhsil ocağının mətbuat xidmətindən APA-ya verilən məlumata görə, «Şəfa» stadionunda keçirilən final görüşündə NDU təmsilçisi «Universitet» Azərbaycan Kooperasiya Universitetinin tələbələrdən ibarət komandasını 4:1 hesabı ilə məğlub edib. III yer uğrunda mübarizə isə Azərbaycan Dövlət Bədən Tərbiyəsi və İdman komandası ilə Lənkəran Dövlət Universitetinin (LDU) komandaları arasında aparılıb. Görüş idman akademiyası tələbələrinin 3:1 hesablı qələbəsi ilə başa çatıb. Qalib komandaya yarışın baş mükafatı – fəxri kubok və 20 000 manat məbləğində pul mükafatı təqdim edilib.