Bakı - APA-Sport. İspaniyanın “Barselona” klubunun Direktorlar Şurasının 17 üzvündən 8-i istefa verib. “APA-Sport” agentliyinin məlumatına görə, istefa ərziəsinə Albert Visens, Mark İnqla, Ferran Soriano, Xavyer Kambra, Andoni Rovira, Klaudia Vives-Fiero, Evarist Murtra və Xosep Luis Vilaske imza atıblar. Eyni zamanda “Barselona”nın vitse-prezidenti vəzifəsini daşıyan Albert Visens istefanın səbəbini belə izah edib: “Əsas problem prezident Xuan Laporta ilə razılığa gəlməməyimizlə bağlıdır. O, öz postunda qaldığı üçün biz klubdan ayrılmaq qərarına gəldik”. Direktorlar Şurasının istefa verən 8 üzvündən 3-ü həm də vitse-prezident idi. Onlar etimadsızlıq göstərdikləri prezident Xuan Laportanın dünən istefa verəcəyini gözləyirdilər. Ancaq X.Laporta 2010-cu ilədək postundan getməyəcəyini bəyan edib. Klubda əsas narazılıq “Barselona”nın uğursuzluğundan sonra yaranıb. Kataloniyalılar 2007/08 mövsümündə İspaniya Primerosunda 3-cü yerlə kifayətləniblər. Çempionlar Liqasının isə yarımfinalında mübarizəni dayandıran “Barselona” ötən mövsüm titulsuz qalıb.