Bakı. Vüqar Xeyrullayev - APA-Sport. “Bir müddət öncə Bakının “Standard” klubunda baxışda olmuşam. Həmin vaxt bəzi Azərbaycan komandalarının oyunlarını izləyə bildim”. “APA-Sport” agentliyinin məlumatına görə, bu sözləri Makedoniyanın “Rabotniçki” klubunun futbolçusu Ardiyan Nuxiu deyib. Sabah Çempionlar Liqasının birinci təsnifat mərhələsi çərçivəsində Bakıda “İnter”lə qarşılaşacaq skopyelilərin 30 yaşlı hücumçusu Azərbaycan futbolunun zəif olduğunu bildirib: “Azərbaycan klubları bir o qədər də güclü deyil. İnanın ki, onlarda Avropa miqyaslı yarışlarda uğur qazanmaq qabiliyyəti yoxdur. Düzdür, Azərbaycanda futbola çox böyük maddi vəsait qoyurlar. Aydındır ki, rəqib bizimlə müqayisədə daha hazırlıqlıdır. Lakin ən vacibi bizim necə oynayacağımızdır”.
Qeyd edək ki, “İnter” - “Rabotniçki” matçı sabah 21:00-da Tofiq Bəhramov adına Respublika stadionunda başlanacaq.