Antalyada təlim-məşq toplanışında olan Bakının “Neftçi” klubunun növbəti yoxlama görüşündə qarşılaşacağı rəqib müəyyənləşib. Bu barədə apasport.az saytına komandanın mətbuat xidmətinin rəhbəri Səbuhi Səfiyarlı məlumat verib. Onun sözlərinə görə, yanvarın 20-də Rusiya təmsilçisi “Moskva” klubunun əvəzedici komandası ilə yoldaşlıq oyununun keçirilməsi planlaşdırılıb.

Səfiyarlı bildirib ki, komanda hazırlığı yanvarın 24-də başa vurub Bakıya qayıdacaq. 3 günlük istirahətdən sonra yenidən Antalyaya yollanacaq “Neftçi” fevralın 8-dək təlim-məşq toplanışında olacaq. Komandanın İspaniyaya nəzərdə tutulan səfəri isə baş tutmayacaq. Buna səbəb İspaniya ilə müqayisədə, Türkiyədə yoldaşlıq görüşündə rəqib tapmağın daha asan olmasıdır.

Xatırladaq ki, yanvarın 7-dən Antalyada olan “Neftçi” dörd yoxlama matçı keçirib ki, bunların ikisində qələbə qazanıb, ikisində uduzub. Rusiya “Sibir”ini 1:0, Almaniya “Karl-Zeys”ini 2:1 üstələyən flaqman “Feyenoord”a (Hollandiya) 1:5, “İzmirspor”a (Türkiyə) 0:1 hesabıyla yenilmişdi.

• Premyer Liqa klubu satılıb
• "Liverpul"un Frimponq planı
• "Əl-Nəsr"dən növbəti qələbə
• Rodri üçün mövsüm başa çatdı
• Bravo "Barselona"ya qayıtmağa hazırdır