Hakan Şükür futbol tarixinin seçilənləri siyahısında

22.01.2009 - 13:05

Beynəlxalq Futbol Tarixi və Statistikaları Federasiyası (İFFHS) dünyanın ən məhsuldar hücumçularının siyahısını açıqlayıb. Apasport.az saytının məlumatına görə, sıralamada milli çempionatların güclülər dəstəsində ən azı 200 qol vuranlar yer alıb. Futbol kralı Pele hamıdan çox qol vuran oyunçudur. Lakin braziliyalının özü də ən yaxın izləyicisi olan çex Biscanın orta məhsuldarlığına həsəd apara bilər. Ümumiyyətlə, ilk “onluq”da 4 braziliyalı və 3 macar yer alıb.

200 qol həddini keçən 309 futbolçu arasında Türkiyə milli komandasının 5 sabiq üzvü də var. Onlardan yalnız Hakan Şükür ilk “100-lük”də qərarlaşıb. Türkiyə çempionatında oynamış daha 4 futbolçu da siyahıdadır. Arveladze ilk “100-lük”dədirsə, “Qalatasaray”la tarix yazanlar Hacı və Jardel nisbətən az qol vurub. Van Hooydonk da Superliqadakı qolları sayəsində bu həddə çata bilib.

Postsovet məkanının məşhur oyunçularından Oleq Bloxinlə Oleq Protasov da siyahıda yer alıb. SSRİ çempionatlarında dəfələrlə Bakıya gəlib “Neftçi” ilə qarşılaşan bu iki futbolçu kimi, Roy Makay və Cəfər İrismetov da bakılılara tanışdı. Flaqmanın bu il buraxdığı ilk qolun müəllifi olan hollandiyalı da, bakılıların baxışa çağırdığı özbək də 200 qol həddini çoxdan keçib.

Dünya futbolunun tanınan simalarından Dieqo Maradona ilə Mişel Platini də bombardirlərin siyahısında qərarlaşıb. Pelenin “Futbol kralı” adına şərik göstərilən argentinalı UEFA prezidentini 52 top qabaqlayır.

Qeyd: Mətin Oktayın güclülər dəstəsində keçirdiyi oyunların dəqiqi sayı məlum deyil.

yer	futbolçu	oyun	qol
1	Pele (Braziliya)	560	541
2	Yozef Biscan (Çexiya)	341	518
3	Ferents Puşkaş (Macarıstan)	533	511
4	Romario (Braziliya)	612	489
5	Karlos Roberto de Oliveyra Dinamit (Braziliya)	458	470
6	İmre Şlosser (Macarıstan)	318	417
7	Qyula Şenqeller (Macarıstan)	394	416
8	Ceyms Edvard Makqrodi (Şotlandiya)	408	410
9	Ziko (Braziliya)	596	406
10	Herd Müllür (Almaniya)	507	405
...81	Hakan Şükür (Türkiyə)	534	268
...86	Şota Arveladze (Gürcüstan)_	430	263
...94	Diyeqo Maradona (Argentina)	490	259
...143	Tanju Çolak (Türkiyə)	281	239
...145	Roy Makay (Hollandiya)	485	239
...169	Mario Jardel (Braziliya)	284	231
...184	Georgi Hacı (Rumıniya)	485	227
...189	Mətin Oktay (Türkiyə)	-	226
...190	Van Hoydonk (Hollandiya)	372	226
...202	Cəfər İrismetov (Özbəkistan)	378	222
...206	Hami Mandıralı (Türkiyə)	499	222
...232	Oleq Bloxin (Ukrayna)	471	217
...245	Oleq Protasov (Ukrayna)	446	213
...272	Mişel Platini (Fransa)	400	207
...307	Aykut Kocaman (Türkiyə)	352	200