Dünyanın ən məşhur derbilərindən biri - “Real” və “Barselona” arasında görüş bir nəfərin ölümü ilə nəticələnib. Apasport.az saytının məlumatına görə, “El Klassiko” zamanı 29 yaşlı salvadorlu Antonio Rivas öldürülüb.

Qanlı olay İspaniyada yox, mərhumun vətənində baş verib. Antonio “Real” - “Barselona” matçını San-Salvador şəhərində ictimai yerlərin birində izləyərkən, 3 nəfərlə mübahisəyə girişib. Tərəflər arasında mübahisə qızışdığından, onlar sonradan bir-birlərini söyüşə “qonaq” ediblər. Ancaq həmin 3 nəfər məsələni qəti həll etmək qərarına gəliblər. Onlar Rivasa bıçaqla çoxsaylı zərbələr endirərək, onu qətlə yetiriblər.

Cinayətdə şübhəli bilinən şəxslər artıq həbs olunublar.

Xatırladaq ki, Madridin “Santyaqu Bernabeu” stadionunda keçirilmiş derbidə “Barselona” 6:2 hesablı qələbə qazanıb.