Avropa Liqasında Azərbaycanı təmsil edəcək “Simurq”un Gürcüstanda davam edən təlim-məşq toplanışının yekunlaşacağı tarix müəyyənləşib. Apasport.az saytının məlumatına görə, İsrailin “Bney Yehuda” ilə ilk qarşılaşmasını Bakıda keçirən zaqatalalılar bu üzdən vətənə tez dönməyə qərar verib. Qarşıdakı 3 günü Tbilisidə keçirəcək “Simurq” iyunun 27-də Bakıya qayıdacaq və "Bney Yehuda" ilə oyunun hazırlıqlarını paytaxtda davam etdirəcək. Tofiq Bəhramov adına Respublika stadionunda keçiriləcək matçdan bir gün əvvəl - iyulun 1-də isə klubun ukraynalı baş məşqçisi Roman Pokoranın mətbuat konfransında jurnalistlərlə görüşəcəyi planlaşdırılıb.