“Xəzər-Lənkəran” klubunun fəxri prezidenti, “Palmali” Şirkətlər qrupunun sahibi Mübariz Mənsimov kosmetika sektoruna sərmayə qoymağa hazırlaşır. Apasport.az saytının lent.az-a istinadən məlumatına görə, əsasən gəmiçilik sahəsində çalışan Türkiyənin ən varlı 7-ci iş adamı gözlənilmədən kosmetika biznesinə də girişib.

Mənsimov “Pal Kosmetika Məhsulları İdxalat və İxracat” adlı şirkət qurub. O, şirkət üçün 1 milyon yeni türk lirəsi məbləğində vəsait ayırıb. Azərbaycanlı iş adamının şirkətdəki şəriki “Palmali” rəsmilərindən biri Nuray Perkerdir. Perker bununla bağlı heç bir açıqlama vermək istəməyib. Lakin yeni şirkətin ətirlərdən tutmuş günəş kreminədək çoxçeşidli kosmetika məhsullarının satışı ilə məşğul olacaq mağazalar açmaq istədiyi bildirilir.

Qeyd edək ki, “Forbes” jurnalı tərəfindən dünyanın ən varlı şəxsləri siyahısında 647-ci sırada göstərilən Mənsimov gəmiçiliklə yanaşı, inşaat və media sektoruna da sərmayə qoyur.