Azərbaycan milli komandasının 2010-cu il dünya çempionatının seçmə mərhələsi çərçivəsində qarşıdakı rəsmi oyununu keçirəcəyi Almaniya yığması itki ilə üzləşib. Apasport.az saytının məlumatına görə, Bundestimin baş məşqçisi Yoahim Löv avqustun 12-də Bakıda rəsmi görüşdə yarımmüdafiəçi Simon Rolfesin xidmətindən yararlana bilməyəcək. Almaniyanın “Bayer” klubunun kapitanı olan Simon təlim-məşq toplanışı zamanı diz nahiyəsindən xəsarət alıb. Zədəsi ciddi olan futbolçu bir aylığa sıradan çıxıb. Yaxın günlərdə Rolfesin ayağında cərrahiyyə əməliyyatı olunacaq.