Azərbaycanlı mütəxəssis Şahin Diniyevin çalışdırdığı “Terek”in əvəzedici heyəti Rusiya çempionatının XX turunda ağır məğlubiyyətlə üzləşib. Apasport.az saytının məlumatına görə, Qroznı təmsilçisi səfərdə “Saturn”la matçda qapısında 4 cavabsız qol görüb.

Oyuna uğursuz başlayan Diniyevin yetirmələri rəqibin ardı-arası kəsilməyən hücumları önündə tab gətirə bilməyiblər. Bunun məntiqi nəticəsidir ki, “Saturn” birinci hissədə 3 dəfə fərqlənib. 86-cı dəqiqədə isə Nikitinski görüşdə son nöqtəni qoyub - 4:0.

Çempionatda 8-ci dəfə məğlubiyyət acısı dadan “Terek” hazırda 30 xalla 7-ci pillədə qərarlaşıb. Qroznılılar lider “Spartak”dan 13 xal geri qalırlar. Diniyevin komandası növbəti oyununu sentyabrın 12-də doğma meydanda “Tom”a qarşı keçirəcək.