UEFA ukraynalı beynəlxalq dərəcəli hakim Oleq Orexovu cəzalandırıb. Apasport.az saytının məlumatına görə, bu ilin iyununda Azərbaycan və İspaniya yığmalarının Tofiq Bəhramov adına Respublika stadionunda keçirilən yoldaşlıq görüşünü (0:6) idarə etməyə namizəd olan 42 yaşlı FİFA referisinin lisenziyası qeyri-müəyyən müddətə əlindən alınıb.

Orexov totalizator - rüşvətxorluqla bağlı qalmaqalın qurbanı olub. Belə ki, o, ötən cümə axşamı həbs olunan futbol mafiyasının üzvləri ilə əlaqədə şübhəli bilinir. UEFA-nın İsveçrənin Nyon şəhərindəki mənzil-qərargahına çağırılan Orexovla qitə futbol qurumunun Antikorrupsiya şöbəsində söhbət aparılıb. Bundan sonra ukraynalı beynəlxalq oyunlarda hakimlikdən kənarlaşdırılıb. Əslən Kiyev şəhərindən olan Oleq sonuncu dəfə qitə miqyasında ötən ay Avroliqanın E qrupunda “Bazel” (İsveçrə) - MOİK (Bolqarıstan) görüşünü (3:1) idarə edib.

Qeyd edək ki, cari mövsümdə 6 beynəlxalq, o cümlədən, 2010-cu il dünya çempionatının seçmə mərhələ oyunlarına təyinat alan Orexov milli komandamızın son Avropa çempionu ilə Bakıdakı yoldaşlıq görüşünü idarə etməli idi. Ancaq Oleqin zədəsi olduğu üçün təyinat həmkarı İqor İşenkoya verildi.