Azərbaycan milli komandasının və Ağdamın “Qarabağ” klubunun futbolçusu Vüqar Nadirovun apasport.az saytına müsahibəsi

- “İnter”lə oyunda üstün tərəf olsanız da, məğlub oldunuz. Oyunla bağlı nə deyə bilərsiniz?
- Uşaqlarda yorğunluq var idi. Əksər futbolçularımız yığmanın düşərgəsindən qayıtmışdılar. Buna baxmayaraq, oyuna yaxşı başladıq. İmkanlarımız oldu, amma istifadə edə bilmədik. Bu futboldur, udmaq da var, uduzmaq da.

- Yığmada sol cinahda, klubda isə sağ cinahda oynadın. Fərqli cinahlarda oynamaq çətin deyil?
- Əslində yığmada da sağ cinahda oynayacaqdım. Sonradan müəyyən problemlər yarandı və baş məşqçi məni sola çəkdi. Hansı cinahda oynamağımın heç bir fərqi yoxdur. Çalışıram ki, komandamız uğurlu nəticə qazansın.

- Rəşad Sadıqovun gedişindən sonra müdafiə xəttində boşluq yaranıbmı?
- Boşluq yaranıb. Ancaq heç bir futbolçu əvəzedilməz deyil. Mənim də yerimi dolduracaq oyunçularımız var. Düzdür, Rəşadın komandaya köməyi çox dəyib. Fikrimcə, hər şey yavaş-yavaş düzələcək.

- “Qarabağ” niyə Avropa Liqasında nümayiş etdirdiyi futbolu daxili yarışlarda ortaya qoya bilmir?
- Avropa Liqasının oyunlarından sonra uşaqlarda yorğunluq yaranmışdı. Yavaş-yavaş bərpa oluruq. Artıq bütün diqqətimizi çempionat oyunlarına yönəltmişik. Hər şey qaydasına düşəcək. Qələbələrimizlə azarkeşlərimizi yenə sevindirəcəyik.

- Yeri gəlmişkən, “Qarabağ” yığmanın özəyini təşkil etsə də, 13 ildir çempion ola bilmir. Bu tilsimi cari mövsümdə sındıra biləcəksiniz?
- Sözün düzü, rəhbərlik qarşımıza hələ konkret məqsəd qoymayıb. Buna baxmayaraq, biz mükafatçılar sırasına düşmək üçün mübarizə aparacağıq. İnşallah, sonda istəyimizi reallaşdırarıq.

• Mateuş Silva Çempionlar Liqasının rəmzi heyətində
• Günün canlı yayımlanacaq matçları - TV AFİŞA
• İrfan Can “Fənər” azarkeşlərindən üzr istəyib
• Mourinyo “Benfika”da - RƏSMİ
• TFF-dən “Fənərbaxça”ya: ”Federasiyamız “hesab vermə kürsüsü” deyil”