“Antalyaspor” “Bakı”nı güclü rəqib sayır

25.06.2011 - 14:45

Türkiyənin “Antalyaspor” klubu mövsümlərarası fasilədə Azərbaycan komandası ilə görüşəcək. Apasport.az saytının Türkiyə mətbuatına istinadən məlumatına görə, Bolu və Avstriyadakı hazırlıq planlarını açıqlayan Superliqa təmsilçisi 7 yoxlama oyununu keçirəcəyini və rəqiblərinin birinin “Bakı” olduğunu bəyan edib. “Antalyaspor” məhz Avstriyadakı rəqiblərinin güclü olduğunu, bir-birindən çətin komandalarının görüşəcəyini hesab edir. Belə ki, iyulun 19-da İngiltərənin “Midlsbro”, 21-də Almaniyanın “Ausburq”, 24-də İsrailin “Hapoel” (Hayfa), 26-da “Bakı” ilə görüş nəzərdə tutulub.

“Bakı” növbəti hazırlığın ilk mərhələsinin iyunun 28-dən iyulun 10-a kimi Sloveniyada keçirəcək. Burada 3 yoxlama oyunu – iyulun 2-də Sloveniyanın “Domjale”, 5-də “Neftçi”nin Çempionlar Liqasında rəqibi olan Zaqreb “Dinamo”su və 9-da Türkiyənin “Orduspor” klubu ilə oyun var. Ancaq sonuncular əvvəllər də klublarımızla yoxlama oyunu keçirən “Antalyaspor”dan fərqli Bank Asiya I liqa təmsilçisidir.

Qeyd edək ki, indiyə kimi avrokuboklarda da “Antalyaspor”la görüşmüşük. 2000-ci ildə UEFA kubokunda onun rəqibi “Kəpəz” olub.