Heç kim bizi keçə bilməz!

31.08.2012 - 10:28

UEFA-nın 2008-13-cü illəri əhatə edən reytinq siyahısında dəyişikliklər olub. Apasport.az saytının məlumatına görə, 2012/13 mövsümünün Çempionlar və Avropa Liqasının IV təsnifat mərhələsinin cavab oyunlarında bəzi ölkələr xal hesablarını dəyişə bilib.

Son 5 mövsümü əhatə edən reytinqə Azərbaycan da hesabına növbəti 0,250 xalı yazıb. Bu, “Neftçi”nin Kipr təmsilçisi APOEL üzərində səfər qələbəsi qazanması sayəsində mümkün olub.

3:1 hesablı qələbə ilə cari mövsüm qazanılan xallarımızın sayı rekord həddə - 2,250-yə çatıb. Bu da 2 il əvvəlki rekorddan 0,250 xal çoxdur.

Cari mövsüm toplanan xalların ən böyük hissəsi – 0,875-i “Neftçi”nin, 0,750-si “İnter”ın payına düşür. “Ağ-qaralar” məhz Kiprdəki zəfər sayəsində “bankirlər”i arxada qoyub. Digər 0,500 xal “Xəzər Lənkəran”ın, 0,125-i isə “Bakı”nın hesabındadır.

“Neftçi”nin qələbəsi sayəsində son 5 ilə əsasən özümüz üçün rekord - 7,791 xal yığmağa imkan verib. Bunun da sayəsində Azərbaycan şərik olduğu Moldovanı arxada qoyub.

Artıq 34-cü yerin yeganə sahibi olan ölkəmiz qrupda təmsil olunan ölkələr arasında sonuncu yerdədir. Bu isə o deməkdir ki, arxada qalan ölkələrdən heç biri Azərbaycanı keçə bilməyəcək. “Neftçi”nin növbəti xalları hesabına isə daha da irəliləmək mümkündür.

UEFA reytinqinin 4-cü onluğu

yer	Ölkə	reytinq	Qalıb/klub
31	Sloveniya	8,958	1/4
32	Finlandiya	8,508	0/5
33	Bosniya-Herseqovina	7,833	0/4
34	Azərbaycan	7,791	1/4
35	Moldova	7,666	0/4
36	İrlandiya	7,375	0/4
37	Litva	6,500	0/4
38	Qazaxıstan	5,958	0/4
39	Latviya	5,791	0/4
40	İslandiya	5,416	0/4