Nikolas Kanales: Başqa kluba keçə bilərəm

05.10.2012 - 23:02

Bakının “Neftçi” klubunun futbolçusu Nikolas Kanales Çili mətbuatına müsahibə verib. Apasport.az saytının məlumatına görə, Avropa Liqasının qrup mərhələsinin II turunda İtaliyanın “İnter” klubunun qapısına qol vuran hücumçu matç (1:3) haqda fikirlərini açıqlayıb.

- İtaliya “İnter”i ilə oyun haqda nə düşünürsünüz?
- İndiyədək “İnter”i yalnız televizorda görmüşdüm. İlk dəfə belə rəqiblə qarşılaşırdım. Bunu vurduğum qolla lazımınca qeyd etdim.

- Vaxtilə həmyerliniz İvan Samoranonun oynadığı komandaya qol vurdunuz. Nə hisslər keçirdiniz?
- Mənə elə gəldi ki, “Playstation” oyununun içindəyəm. “İnter”ə qarşı da orda oynayıram. Çox xoşbəxtəm.

- Oyun necə keçdi?
- Bütün gücümü ortaya qoydum. Həmin anda həmin yerdə olmaq üçün əlimdən gələni etdim. Xoşbəxtlikdən orda olub, qol da vurdum.

- Oynadığınız Azərbaycan çempionatı ilə Çili birinciliyini müqayisə edə bilərsiniz?
- Çilidə çempionatda rəqabət böyükdür. Azərbaycanda isə mənim komandam ən böyük klubdur və Avropa Liqasında oynayan tək təmsilçiləridir.

- Komandamnz haqda nə deyə bilərsiniz?
- Komanda yoldaşlarımın demək olar hamısı öz yığmalarında oynayır.

- Gələcəklə bağlı planlarınız nədən ibarətdir?
- Məqsədim üzərimdə çalışıb ustalıq səviyyəmi daha da artırmaqdır. Bununla da gələcəkdə Avropanın daha güclü liqalarına keçə bilərəm.

- Çili milli komandasına dəvət haqda nə düşünürsünüz?
- Mən uzaqgörən deyiləm ki, indidən nə isə deyə bilim. Təbii ki, dəvət olsa yığmaya can atacağam.