“Xəzər Lənkəran” 5-ə çatdı

26.04.2013 - 10:45

“Bakı” ilə Azərbaycan kubokunun yarımfinal matçının cavab oyununda 2:0 hesabı ilə qalib gələn “Xəzər Lənkəran” 1 mövsümlük fasilədən sonra yenidən bu yarışın finalına vəsiqə qazandı. Apasport.az saytının məlumatına görə, 9 illik tarixində 5-ci dəfə buna nail olan “ağ-yaşıllar” 2 dəfə 1/4, 2 dəfə də 1/2 finalda mübarizəni dayandırıb.

İlk 2 mövsümündə finalın 1 addımlığında büdrəyən komanda sonradan “2 final, 1 1/4 final” ardıcıllığına əməl edir. 2006/07 və 2007/08 mövsümlərində kuboku Lənkərana gətirən klub növbəti yarışı 1/4 finalda dayandırdı. Sonradan yenə 2 il ardıcıl final oynayan Lənkəran təmsilçisi ötən mövsüm 1/4 finalda çıxışını başa vurdu.

1/4 finalda mübarizəni dayandırdıqdan sonra yenidən finala yüksələn “ağ-yaşıllar” əvvəlki 4 finaldan 3-də qalib gəlib. 4-cü dəfə mükafata yiyələnməyə çalışacaq komanda bütün finallarını son 7 ildə gerçəkləşdirib. Kubokun 4 qat qalibi ilə finalda görüşəcək “Xəzər Lənkəran” həmin görüşdə bu göstəricidə rəqibinə çatmaqla Azərbaycan rekordunun şəriklərindən olacaq. Belə ki, kuboka hamıdan çox – “Neftçi” ilə “Kəpəz” hərəyə 4 dəfə yiyələnib.

2004/05	1/2 final
2005/06	1/2 final
2006/07	"Xəzər Lənkəran" - "MKT - Araz" (İmişli) - 1:0
2007/08	"Xəzər Lənkəran" - "İnter" (Bakı) - 2:0 əlavə vaxtda
2008/09	1/4 final
2009/10	"Bakı" - "Xəzər Lənkəran" - 2:1 əlavə vaxtda
2010/11	"Xəzər Lənkəran" - "İnter" (Bakı) - 1:1, pen. 4:2
2011/12	1/4 final
2012/13	"Xəzər Lənkəran" - "Neftçi" (Bakı)