“Peşəkar Futbol Liqasının Superkubok matçını iyunun 27-nə təyin etməsi həm təəccüblü, həm də gülməlidir. Dünyanın heç bir yerində bu tarixdə superkubok oyunu keçirilmir”. Bunu apasport.az saytına “Xəzər Lənkəran”ın mətbuat xidmətinin rəhbəri Hüseyn Cəbrayıloğlu deyib.

Topaz Premyer Liqasında çempionluğa “Neftçi” ilə yanaşı nəzəri şansları qalan “Qarabağ” da iddia edir. Ancaq real yanaşdıqda, Ağdam təmsilçisinin növbəti 2 turda 6 xallıq fərqi əridib, qızıl medalları qazanması real görünmür.

Bu üzdən böyük ehtimalla, çempion ardıcıl 3-cü dəfə “Neftçi” olacaq. Bu isə o deməkdir ki, ölkə kubokunun finalında olduğu kimi, Superkubok matçında da “Böyük oyun”un iştirakçıları mübarizə aparacaq.

Ancaq “Xəzər Lənkəran” tərəfi iyunun 27-də matç keçirməyin əleyhinədir. Buna səbəb tarixin klub üçün münasib vaxtda olmamağıdır.

Cəbrayıloğlunun sözlərinə görə, avqust ən münasib vaxtdır: “Biz təxminən iyunun 19-da Avstriyaya 12 günlük toplanışa gedəcəyik. Artıq klubun hazırlıq planları baş məşqçimiz tərəfindən tərtib olunub. Hiss edirəm ki, Con Toşakın özü də təəccüb içindədir ki, avrokuboklara hazırlıq mərhələsinin gərgin vaxtına Superkubok oyunu salınıb. Belə çıxır ki, Superkubokdan ötrü biz Avstriyada 5 gün hazırlaşdıqdan sonra Bakıya qayıtmalıyıq. Bu matçı oynadıqdan sonra isə yenidən Avstriyaya getməliyik ki, bu da artıq planlarımızı pozur. Biz oyunun avqustda baş tutmasını istəyirik. Hələ bu barədə PFL-ə müraciət etməmişik. İnanıram ki, qurum bizim istəyimizi anlayışla qarşılayacaq. Oyun avqusta keçirilməsə, onda “Xəzər Lənkəran” Superkubokda olmayacaq. Bir sözlə, bizim iyunda Bakıda oyun keçirmək fikrimiz yoxdur”.

Səbuhi TOFİQOĞLU

• Dadaşov oynamadı, komandası növbəti tura yüksəldi
• “Mançester Yunayted” yeni baş məşqçi ilə anlaşıb
• “Qızıl top”un sahibi: "Bir gün vətənə qayıdıb, orada yenidən oynaya biləcəm"
• Mario Balotelli İtaliya klubunda - Rəsmi
• Rodri Ronaldodan sonra ikinci oldu