“Qarabağ” qələbə seriyasını 7-yə çatdırıb. Apasport.az saytının məlumatına görə, Topaz Premyer Liqasının XXX turunun “Neftçi” ilə səfər matçında 2:1 hesablı qələbə qazanan Ağdam təmsilçisi mövsümün rekordu olan seriyasını daha da yaxşılaşdırıb.
Qurban Qurbanovun yetirmələri sonuncu dəfə XXIII turun “İnter”lə səfər matçında xal itirib – 1:1. Bundan sonra keçirdiyi 7 görüşdə 21 xal toplayan üçqat Azərbaycan çempionu seriyası davam etməkdə olan dünya klubları sırasında ön sıralardadı.
Bu siyahıya ardıcıl 9 qələbə qazanan İsveç “Yurqorden”i başçılıq edir. İrlandiyanın aşağı dəstə təmsilçisi “Limerik”in seriyası 8-ə bərabərdi.
3-cü pillənin üç şəriki var. Belə ki, “Qarabağ” kimi daha iki komanda son 7 turda xal itirməyib. Bunlar İspaniyanın “Real” və Yunanıstanın “Olimpiakos” klublarıdı.