[b]Litvalı qapıçı “İnter”lə oyun barədə: Qələbəyə oynayacağıq[/b]

28.01.2017 - 13:00

“Çempionatın ikinci hissəsi üçün təlim-məşq toplanışını Bakıda keçsək də, hər şey ideal oldu. Bizim üçün yaxşı şərait yaradılmışdı. İstədiyimiz kimi də hazırlaşa bildik”. Apasport.az saytı xəbər verir ki, bu sözləri “Kəpəz”in qapıçısı Tadas Simaitis deyib.

Klubun saytına açıqlama verən litvalı qolkiper Gəncə təmsilçisinin qış fasiləsindəki hazırlığı danışıb: “Türkiyə və ya İspaniyada da olsaydıq, belə hazırlaşacaqdıq. Mən fərq görmürəm. Əsas olan toplanışdan səmərəli yararlanmaqdı. Düşünürəm ki, biz fasilə dövründən güclənməyimiz üçün ən yaxşı şəkildə istifadə edə bildik. Fiziki kondisiyalarımızı artırdıq, taktiki və texniki yöndə məşq etdik, yoxlama oyunları keçirdik. Biz sözlə, təlim-məşq toplanışı uğurlu alındı. Fikrimcə, Premyer Liqaya hazırıq. Bütün komanda yoldaşlarım hazırlıq dövründə verilən tapşırıqları yerinə yetirməklə üzərinə düşəni etdi. Tətil günlərində də boş oturmamışdıq. Formamızı qorumaq üçün fərdi qaydada hazırlaşmışdıq”.

Simaitis bu gün “İnter”lə keçirəcəkləri oyuna da toxunub: “Komanda qələbəyə oynayacaq. Düzdü, rəqibimiz də eyni məqsəd üçün meydana çıxacaq. Odu ki, bizi qarşıda çətin oyun gözləyir. İlk iki dövrədə onlarla keçirdiyimiz görüşlərdə qalib müəyyənləşməyib. Bakıdakı qarşılaşmada qələbəyə daha çox yaxın idik. Təəssüf ki, artırma dəqiqəsində mənim səhvimdən sonra qapımızda qol gördük və hesab bərabərləşdi. İndi daha yaxşı oynamalıyıq”.

Qolkiper “sarı-göylər”in Avropa Liqasına vəsiqə qazanmaq üçün mübarizə aparacağını, amma bunun heç də asan olmayacağını bildirib: “Əgər qitəmiqyaslı turnirə yenidən vəsiqə qazanmağı düşünürüksə, yersiz yerə xal itirməməliyik. Bütün oyunlara maksimum nəticə üçün çıxmalıyıq. Rəqiblərimiz də eyni istəklə mübarizə aparırlar. Ona görə də, bu mövsüm daha çətin olacaq. Şans həmişə var, sədəcə, imkandan düzgün yararlanmaq lazımdı. Bizi qarşıda daha 14 oyun gözləyir. Marafon uzundu, layiqli şəkildə çıxış edib azarkeşlərimizi bir daha sevindirməliyik”.