Sabah UEFA Superkuboku uğrunda qarşılaşma keçiriləcək. Apasport.az saytının məlumatına görə, ötən mövsümdə avrokubokların qalibi olan qitə nəhəngləri Makedoniyanın paytaxtı Skopyedə münasibətlərini aydınlaşdıracaq.
Çempionlar Liqasının son qalibi “Real” Avropanın ən güclüsü olduğunu bir daha sübut etməyə çalışacaq. Avropa Liqasını qazanmaqla Çempionlar Liqasına vəsiqə qazanan “Mançester Yunayted” qitənin ikinci dərəcəli klub turnirindəki qələbəsinin davamını gətirməyə iddialıdı.
Hər iki komanda əvvəllər də Superkubok qarşılaşmasında iştirak edib. “Real” son üç kubokdan ikisinin qalibidi. 2014 və 2016-cı illərdə bu titula yiyələnən madridlilər ardıcıl 2-ci dəfə Superkuboku muzeyinə aparmaq niyyətindədi.
“Kral klubu” bunu bacarsa, “Ayaks” və “Milan”dan sonra ardıcıl iki dəfə qalib gələn 3-cü komanda olacaq. Hollandiyalılar 1972 və 1973, italiyalılar isə 1989 və 1990-cı ildə qələbələri sıralayıb. Son 27 ildə isə heç bir komanda titulunu növbəti mövsümdə qoruya bilməyib.
Əgər “Real” qalib gəlsə, ardıcıl 4-cü dəfə kubok İspaniyaya yollanacaq. 2014 və 2016-cı ildə madridlilər, 2015-ci ildə “Barselona” belə nailiyyət əldə edib. İspaniya 2009-12-ci illərdə də ardıcıl 4 Superkubok qazanmaqla rekord müəyyənləşdirib ki, bu dəfə həmin nəticənin təkrarlanması mümkündü.
Konkret “Real”a gəldikdə, paytaxt klubu 1998 və 2000-ci illərdə Superkubokda uduzubsa, 2002-ci ildə ilk qələbəsini qazanıb. Son üç ildə əldə edilən iki titulu da saysaq, madridlilər 6-cı matçında 4-cü dəfə kuboka yiyələnmək istəyindədi.
“Mançester Yunayted” isə 26 ildən sonra kuboku qazanmaq istəyindədi. “Qırmızılar” yeganə uğurunu uzaq 1991-ci ildə əldə edib. 2-ci dəfə Superkubok sahibi olmağa can atan ingiltərəlilər 1999 və 2008-ci illərdə həlledici matçda uduzub.
Maraqlıdı ki, mançesterlilər 26 il əvvəlki kimi yenə ikinci dərəcəli kubokun qalibi kimi döyüşə çıxır. Uğursuz iki cəhddə isə komanda Çempionlar Liqasının qalibi olub. Madrid təmsilçisi isə Superkuboka həmişə Çempionlar Liqasının qalibi kimi qatılıb.
İngiltərə klubları 12 ildən sonra bu yarışda qələbə həsrətinə son qoya bilər. Futbolun yaradıcılarının son uğuru 2005-ci ildə qeydə alınıb. Həmin vaxt “Liverpul” Rusiya MOİK-ini məğlub edib – 3:1.
Qeyd edək ki, Skopyedəki II Filip stadionunda baş tutacaq matç Bakı vaxtı ilə saat 22:45-də başlayacaq.
UEFA Superkuboku
8 avqust
22:45. “Real” (Madrid, İspaniya) – “Mançester Yunayted” (İngiltərə)
Baş hakim: Canluka Rokki
Baş hakimin köməkçiləri: Elenito Di Liberatore, Mauro Tonolini
Əlavə hakim köməkçiləri: David Massa, Massimiliano İrrati
Ehtiyat hakim Rikkardo Di Fiore (hamısı İtaliya)
Dördüncü hakim: Klement Turpin
UEFA nümayəndəsi: Marko Kasaqrande (Finlandiya)
Skopye (Makedoniya). II Filip stadionu
Oxşar xəbərlər
Ana səhifə
Bütün xəbərlər