Azərbaycan millisinin DÇ-2018-in bu ay keçiriləcək seçmə oyunlarına çağırılan heyətində yer alan futbolçuların yığmadakı göstəriciləri bəlli olub. Apasport.az saytının hesablamalarına görə, oktyabrın 5-də Çexiyanı qəbul edib, 3 gün sonra Almaniyanın qonağı olacaq millimizin 24 üzvünün indiyədək yığmada neçə oyun keçirib, neçə qol vurması müəyyənləşib.

Komandamızın heyətində yalnız bir futbolçu hələlik millidə debüt etməyib. Bu da yığmanın üçüncü qapıçısı Emil Balayevdi. “Səbail”in üzvü iki oyundan birində şans qazansa, ilk dəfə yığma forması geyinəcək.

Digər 23 oyunçu isə milli həyəcanı yaşamış simalardı. Onlar arasında rekordçu isə yığma tarixində ən çox oyun keçirən Rəşad Sadıqovdu. Kapitan bu günə qədər 110 matçda millinin şərəfini qoruyub.

Bakı Olimpiya Stadionunda Çexiyaya qarşı keçiriləcək matç onun üçün 111-ci olacaq. Bununla, Rəşad yığmada ən çox oyun keçirən futbolçular arasında dünya 229-cusu adına şərik olacaq. Hazırda 111 oyun keçirən 8 futbolçu 229-cu yerə şərikdi. Onlar arasında Andrey Şevçenko, Karlos Valderamma, Şinji Okazaki kimi tanınmış simalar da var. Onlara şərik çıxacaq azərbaycanlı müdafiəçi hazırkı mövqeyini tərk edəcək.

İndi 110 matçla 237-ci yeri bölüşənlərdən biri olan Sadıqov Fernando Torres, Sesk Fabreqas, Dieqo Qodini kimi futbolçuları arxada qoymaq imkanına malikdi. Lakin sonuncular da oyun sayını artıra bilər.

Millimizin Çexiya və Almaniya ilə oyunlarına çağırılan digər futbolçulardan Ruslan Abışov neçə vaxtdı gerçəkləşməyən yubileyi – 50-ci oyunu gözləyirsə, Namiq Ələsgərov 10-cu dəfə meydana çıxa bilər.

Hazırkı heyətdə 2-ci olan Kamran Ağayev Çexiyaya qarşı matçda 68-ə çatacaq. Bununla da qapıçı yığma tarixində 6-cı olan Qurban Qurbanova şərik çıxacaq. Almaniyada baş tuta biləcək 69-cu oyun isə qolkiperə millinin bombardirini arxada qoymaq imkanı verəcək.

• Yoxlama matçı: "Qalatasaray" 0:3-dən geri döndü
• İngiltərə Futbol Assosiasiyasından “Mançester Siti” açıqlaması: “Lazım gələrsə, tədbir görəcəyik”
• “Qalatasaray”da Lemina sevinci – Komanda ilə məşqlərə başladı
• Vitinya: “Jorje Jezuşun işi artıq nəticə verir”
• Leao Ronaldonun “7” nömrəsindən danışdı: “O, uşaqlıq kumirimdir”