“Keşlə”nin yarımmüdafiəçisi Sezar Meza Kollinin apasport.az saytına müsahibəsi
- Avropa Liqasına gözlənilmədən uğursuz start götürdünüz. I təsnifat mərhələsində “Baltsan”a böyük hesablı məğlubiyyətin (1:4) səbəbi nə idi?
- Qəribə oyun oldu. Çoxlu səhvlərə yol verdik və bunun da nəticəsində belə məğlubiyyətlə üzləşdik. Halbuki, matça çox yaxşı hazırlaşmışdıq və Maltaya qələbə üçün yollanmışdıq.
- Bəlkə arxayınlığın qurbanı oldunuz?
- Xeyr, komandada arxayınlıq yox idi. Ümumiyyətlə, Avrokubokda zəif rəqib olmur. Sadəcə, şanssızlıq yaşadıq. Elə səhvlər etdik ki, bunları bir daha təkrarlamamalıyıq.
- “Baltsan” sizi 4:1 hesabı ilə məğlub edəcək gücdədi, yoxsa “Keşlə” həmin gün çox zəif oynadı?
- “Baltsan” zəif komanda deyil. Hər halda, Avropa Liqasında mübarizə aparırsa, deməli, ölkəsinin ən yaxşılarındandı. Ancaq biz onlardan güclüyük. Sadəcə, həmin gün bəxt rəqibin tərəfində idi.
- Cavab matçı öncəsi baş məşqçi Yuri Maksimovun istefasını necə qarşıladınız?
- Baş məşqçi ayrılıq qərarını öncə elə futbolçulara bildirdi. Bizə uğurlar arzuladı. Futbolda belə hallar olur. İndi önümüzə baxmalı, “Baltsan”la cavab matçına köklənməliyik.
- Bəlkə məğlubiyyətin günahkarı olduğu üçün belə bir qərar qəbul edilib?
- Bu barədə nəsə deyə bilmərəm. Yaxşısı budu, bu sualı Maksimovun özünə verəsiniz.
- İki gündən sonra cavab oyununa çıxacaqsınız. Matç öncəsi baş məşqçinin ayrılığı komandaya mənfi təsir göstərməyəcək?
- Yuri Maksimovla birlikdə çalışmaq mənə xoş idi. Ancaq biz peşəkar futbolçularıq. İndi yalnız cavab oyununu düşünmək məcburiyyətindəyik.
- Nəyə ümid edirsiniz? Hələ də mərhələ adlayacağınıza inanırsınız?
- İnanıram ki, yaxşı oyun göstərəcəyik və çətin də olsa, növbəti mərhələyə vəsiqə qazanacağıq. Bilirik ki, çox çətin vəzifəmiz var. Ancaq öz potensialımıza və komanda yoldaşlarıma güvənirəm.
Ruslan SADIQOV