“Sauber F1” komandasının üzvü Markus Eriksson Bakı Şəhər Halqasının Əməliyyat Komitəsinə müsahibə verib. Apasport.az saytının məlumatına görə, pilot iyunun 17-19-da Bakıda keçiriləcək “Formula-1” üzrə Avropa Qran-prisi haqda danışıb, azərbaycanlı azarkeşlərə mesaj yollayıb.

- Bakı Şəhər Halqasının sxemi haqqında nə deyə bilərsiniz? Simulyatorda test etmisinizmi?

- Deyə bilərəm ki, 6 km uzunluğunda olan Bakı treki çox uzundu, bundan əlavə Monako və Sinqapurdan sonra üçüncü şəhər treki olacaq. Simulyator olmadığından, Bakı Şəhər Halqasını test edə bilməmişik. Ona görə yarışdan öncə - iyunun 16-da trek boyu gəzinti bizim üçün böyük əhəmiyyət kəsb edir. 

- Bakı və Azərbaycan haqqında nə bilirsiniz?
- Düzünü desəm, çox məlumatım yoxdu, lakin yeni şəhərlərə səyahət etməyi çox sevirəm.

- Mövsümün başlanğıcını necə xarakterizə edərdiniz?
- Bolidimiz “Sauber C35”i nəzərə alsaq, şəxsən öz çıxışımdan razıyam. Komandaya gəldikdə isə, rəqabətə daha davamlı olmağı və xal uğrunda mübarizə aparmağı istərdim. 

- Yeni trekə gəldikdən sonra ilk işiniz nə olur?
- Trek üzrə gəzintiyə çıxıram. 

- Sizcə, əsas rəqibiniz kimdi? 
- Ronni Peterson.

- Azərbaycanda olan pərəstişkarlarınıza nə demək istərdiniz? 
- Çox sevinirəm ki, “Formula 1”də yeni ölkə və yeni trekdə çıxış edəcəyik. Səbirsizliklə Bakıdakı yarışı gözləyirəm və ümid edirəm ki, bizi dəstəkləyən çox sayda pərəstişkar görəcəyik.