İdman Araşdırmalar Mərkəzi (İAM) ardıcıl 4-cü dəfə "İlin qalibləri" layihəsinin icrasına başlayıb. Apasport.az saytının məlumatına görə, ilkin mərhələdə 8 nominasiya üzrə namizədlər müəyyənləşəcək.

1. İlin idman xadimi;

2. İlin yerli futbolçusu;

3. İlin yerli idmançısı (digər növlər üzrə);

4. İlin əcnəbi idmançısı (bütün növlər üzrə);

5. İlin komandası (futbol və digər növlər üzrə);

6. İlin baş məşqçisi (futbol və digər növlər üzrə);

7. İlin mətbuat katibi (futbol və digər növlər üzrə);

8. İlin idman jurnalisti.

Futbol nominasiyaları üzrə namizədlər dekabrın 9-da, digər növlər üzrə isə dekabrın 13-də açıqlanacaq. Bu da futbol üzrə Avropa Liqasının qrup mərhələsində son turun dekabrın 8-də, taekvondo üzrə komandalararası Dünya Kubokunun isə 12-13 dekabrda keçiriləcəyi ilə əlaqədardır. Qaliblərlə yanaşı, İAM-ın xüsusi mükafatlarının sahibləri dekabrın sonlarında təşkil olunacaq təntənəli mərasimdə mükafatlandırılacaqlar.