[b]“Bizim küçədə də bayram olacaq” – Şahin Diniyev[/b]
21.10.2017 - 17:32
[b]“Bizim küçədə də bayram olacaq” – Şahin Diniyev[/b]

“Oyun haqda çox şey demək istəmirəm. Səbəblər içimizdədi”. Apasport.az saytı xəbər verir ki, bu sözləri “Kəpəz”in baş məşqçisi Şahin Diniyev deyib.

 

Ölkə çempionatının IX turu çərçivəsində “Neftçi”ni qəbul edən Gəncə təmsilçisi 0:1 hesabı ilə məğlub olub.

 

Görüşdən sonra mətbuat konfransı keçirən Diniyev bunları deyib: “Məğlub olsaq da, komandadan razı qaldım. Oyundan-oyuna futbolçular yaxşı təsir bağışlayırlar. Birinci hissədə Viktor rəqib qapıçı ilə təkbətən çıxsa da, fərqlənə bilmədi. Əvəzində standart vəziyyətdən sonra qol buraxdıq. Bundan sonra çalışdıq ki, uzun ötürmələrdən yararlanaq. Futbolçular istəkli idi. Amma alınmadı. Bugünkü duruma görə komandadan razı qaldım. Diqqətimizi növbəti oyuna yönəltməli, sona qədər mübarizə aparmalıyıq. Stabil heyəti qurmaq vacibdi. Axtarışdayıq. Əlimizi yerə salıb, dayanmamalıyıq. Təkcə ölümə çarə yoxdu. Bugünkü məğlubiyyətə görə məsuliyyəti mən daşıyıram. Gec-tez bu durumdan çıxacağıq. Bizim də küçəmizdə bayram olacaq”.

 

- Hakimlikdən razı qaldızmı?

- İndi nəsə desəm, naşılıq olar. Təkrara baxdıqdan sonra fikir bildirsəm, yaxşıdı.

 

- “Kəpəz” turnir cədvəlinin son pilləsində qərarlaşıb. Səbrinizin daşması üçün bu, nə qədər davam etməlidi?

- Məndən əvvəl azarkeşlər var. Təbii ki, mənim də imicim var. Bu durumla barışmayacam. Başımızı aşağı salıb, çətin durumdan çıxmalıyıq. Qış fasiləsinə qədər bacardığımız qədər xal toplamalıyıq. Getmək çox asandı. Bu komandanı mən qurmuşam. Sona qədər “vuruşacağıq”. Əminəm ki, çətin vəziyyətdən çıxacağıq. Stabil heyət müəyyənləşdirə bilmirik, problem bundadı. Əl-ələ verib, bu durumdan xilas olmalıyıq.

 

- “Kəpəz”in heyətinin güclü olmadığını bilirik. Qış fasiləsində dəyişiklik olacağına inanırsızmı?

- “Neftçi”nin heyətində ehtiyatda 9 futbolçu oturmuşdu. Kaş ki, onlardan 3-4-ü mənim ixtiyarımda olaydı. Mən bilirdim ki, büdcəmiz aşağı olacaq. Buna razılaşmısamsa, indiki durumda komandanı atıb getmək çox asandı. İşlədiyin vəziyyətdə problemi deyə bilmirsənsə, çıxıb gedəndən sonra nəsə demək düz olmaz. Açığı, qışda bunlardan yaxşı futbolçu alacağımızı deyə bilmərəm. Büdcəmiz buna imkan vermir. Amma azad agent statusu daşıyan oyunçu olsa, heyətimizə qata bilərik. Maksimum 1-2 nəfərlə güclənməyimiz mümkündü.

 

- Ardıcıl bir neçə matçı səfərdə keçirdiz. Bu, komandanın psixoloji durumuna təsir etdimi?

- Birinci dövrədə 7 matçdan 2 ev oyununda qalib gəlsəydik, 4-5-ci yerdə qərarlaşardıq. Belə olan halda, futbolçularda özünəinam hissi yaranır. Hər dəfə uduzanda isə onlarda xof yaranır. Amma meydançaya görə dəyərdi. Sözümün üstündə duracam. Bu durumdan yüz faiz çıxacağıq. Hər uğursuzluqda bir uğur var.

0