Klublar Komitəsi yeni ilə bəyanatla yollanır

Bu gün ilin son yığıncağını edən və yeni sədrini seçən AFFA Klublar Komitəsi bəyanat yayıb. Apasport.az saytı xəbər verir ki, komitə son vaxtlar danışılmış oyunlarla bağlı yaranmış qalmaqala münasibət bildirib.

Bəyanatda bildirilir ki, dünyanın müxtəlif ölkələrində idman oyunlarının nəticələrinin manipulyasiyası cəhdləri ölkəmizdə də müşahidə edilib: “Son vaxtlar ölkə futbolunda baş verən neqativ halların aşkarlanması, bu işdə birbaşa və ya dolayısıyla iştirak edən şəxslərin cəzalandırılması və ədalətli oyun prinsiplərinə əməl olunması təqdirəlayiq haldı. Mövcud problemlə bağlı Klublar Komitəsinin bu gün keçirilmiş iclasında geniş müzakirə aparılıb və UEFA-nın danışılmış oyunlarla bağlı AFFA-dakı nümayəndəsi Kamran Cəbrayılovun təqdim etdiyi məlumatlar dinlənilib. Klublar Komitəsi olaraq idman oyunlarının nəticələrinin manipulyasiyasında iştirak edən şəxslərin əməllərini pisləyir və layiqli şəkildə cəzalandırılmalarını, ölkə futbolunun inkişafı istiqamətində atılan addımı yüksək qiymətləndiririk. Həmçinin bəyan edirik ki, bu istiqamətdə istər AFFA, istərsə də hüquq mühafizə orqanları ilə sıx əməkdaşlıq etməyə, hər cür köməklik göstərməyə hazırıq”.

Qeyd edək ki, danışılmış oyunlarda iştirak etməkdə günahlandırılan “Keşlə”nin sabiq futbolçuları Nizami Hacıyev və Mirhüseyn Seyidov bu yaxınlarda futboldan ömürlük uzaqlaşdırılıblar.