“Keşlə”nin hücumçusu Pərdis Fərcad-Azadın apasport.az saytına müsahibəsi.
- Komandada vəziyyət necədi?
- Qəti fikir bildirmək üçün hələ tezdi. Ancaq məşqlərimizi davam etdiririk, yeni oyunçular gəlir. Belə deyək də, hər şey yaxşılığa doğru dəyişir. Hər gün 2 dəfə məşq keçirik. Bunun da öz çətinliyi var.
- Yuri Maksimov komandanı toparlaya və hazırkı vəziyyətdən çıxara bilərmi?
- İşini bilən mütəxəssisdi. Məşqləri maraqlı keçir. Bunlar ilkin təəssüratlardı. Məncə, komandanı toparlamağı bacaracaq.
- Tələblərini komanda üzvlərinə çatdırıbmı?
- Yaxşı oynamağımızı tələb edir. Taktiki məşqlər keçmirik. İndi fiziki hazırlıq üzrə məşqlərə yer veririk. Taktika ilə bağlı çalışmaları Türkiyədə keçəcəyik. İntizama diqqət yetirməyimizin vacibliyini qeyd edib.
- Ukraynalı məşqçilər atletik futbola üstünlük verdiyinə görə, fiziki hazırlıq vacibdir onlar üçün…
- Əksinə, Maksimov texnikalı futbola üstünlük verəcək. Çünki bizdən bunu istəyir.
- Bəs, komandaya yeni qoşulan futbolçular kömək edəcək gücdədirlər?
- Xeyri dəyəcək futtbolçulardı. Baş məşqçi hər birini hazırlıq prosesində, yoxlama oyunlarında sınayır. Kim diqqətini cəlb edir, istədiyini ala biləcəyini düşünür, onu komandada saxlayır. Yenilərin adını bir-bir çəkmək istəmirəm. Ümumi götürdükdə, pis deyillər. Həm də “transfer pəncərəsi” bağlanmayıb. Yəqin yenə 1-2 futbolçu qoşulacaq. İndidən deyə bilərəm ki, qışdan sonra başqa “Keşlə” görəcəksiniz.
- Qış fasiləsinə qədər “Keşlə” daha çox maliyyə sıxıntıları və futbolçuların bəzi oyunlarda bilərəkdən zəif oynaması ilə yadda qaldı. Fasilədən sonra bunların təsirindən tamamilə qurtula biləcəksiniz?
- Maliyyə ilə bağlı vəziyyətin yaxşı olacağını deyiblər. Rəhbərlik deyibsə, deməli, bildiyi nəsə var ki, futbolçulara bunu açıqlayıblar. Məncə, neqativ təsirlər keçmişdə qaldı.
- “Keşlə”nin ölkə kubokunu qazanıb avrokuboklara yollanmaq şansı var. Bunu real hesab edirsinizmi?
- Avrokuboklara qısa yol ölkə kubokunu qazanmaqdan keçir. Bizim də belə istəyimiz var. Əlbəttə, çempionatdakı durumumuz da yaxşı deyil və bunu düzəltmək üçün çalışacağıq.