Futzal üzrə Qazaxıstan millisinin və “Kayrat” klubunun baş məşqçisi vəzifəsində dəyişiklik edilib. Apasport.az saytının məlumatına görə, Avropa çempionatını 4-cü pillədə başa vuran Qazaxıstan millisinin nəticələri məqbul sayılmadığından federasiya rəhbərliyi Kakaunun xidmətinə ehtiyac duymayıb və yeni mütəxəssis dəvət edib.
Komandanı yenə braziliyalı mütəxəssis çalışdıracaq. Söhbət son illərdə Rusiyanın “Qazprom - Yuqra” komandasının baş məşqçisi kimi çalışan, Rusiya və UEFA kubokunu qazanan Kakadan gedir. O, “Qazprom-Yuqra”nın təklifindən imtina edib və Qazaxıstandan gələn yeni dəvəti müsbət dəyərləndirib.
Qeyd edək ki, vaxtilə millimizin də formasını geyinən Kaka məşqçi kimi ilk addımlarını “Neftçi” İK-nin “sükan”ı arxasında atıb.