Kişi voleybolçular arasında Azərbaycan Yüksək Liqasında pley-off mərhələsində çıxış edəcək 4 komandadan 3-nün adına aydınlıq gəlib. Apasport.az saytının məlumatına görə, bu, bir gün öncə keçirilən X turun görüşlərinə əsasən dəqiqləşib.

Belə ki, 10 matçın hamısında qalib gələn “Lokomotiv” birinci yerdəki mövqeyini möhkəmlədib. Son Azərbaycan çempionunun “Naxçıvan” və “Ekspress”lə oyunlarının qaldığını nəzərə alsaq, pley-offa lider kimi yüksələcəyini proqnozlaşdırmaq mümkündü. İkinci yerdə qərarlaşan “Sərhədçi”nin də mövqeyini əldən verəcəyi inandırıcı deyil. MOİK və “Naxçıvan”la qarşılaşacaq komanda ən yaxın izləyicisi “Neftçi”ni 6 xal qabaqlayır. Onlar bu qarşılaşmalarda xal qazanmasalar belə set fərqində və şəxsi görüşdə “ağ-qaralar”ı geridə qoyacaqlar.

3-cü pillədə qərarlaşan “Neftçi”nin də mübarizəni növbəti mərhələdə davam etdirəcəyi dəqiqləşib. Onlar ən yaxın izləyiciləri MOİK-dən 9 xal irəlidədilər. Son pley-offçunun adına isə qarşıda olan matçlar aydınlıq gətirəcək. Bu vəsiqəyə üçün “Ekspress” artıq “ofsayd”a düşdüyündən MOİK, U-18 və “Naxçıvan” mübarizə aparacaq.

Qeyd edək ki, çempionatın əsas hissəsi aprelin 12-də yekunlaşacaq. Pley-off mərhələsinin isə aprelin 14-də və 16-da keçirilməsi planlaşdırılır. Bu mərhələdə qalib 2 qələbənin yekuna əsasən müəyyənləşəcək. Əgər ehtiyac olarsa, üçüncü matç keçiriləcək.