Daşkəsən. Nəzakət Məşədiəliqızı –APA-Sport. Gənclər və idman naziri Azad Rəhimov Daşkəsən rayonunun Xoşbulaq kəndində idman kompleksinin təməlqoyma mərasimində iştirak edib. Nazir “APA-Sport”a bildirib ki, dəniz səviyyəsindən 1700 metr yüksəklikdə ilk dəfədir ki, idman kompleksi inşa olunur. Kompleksin sahəsi 5 hektardan artıqdır. Burada 700 nəfərlik idman zalı, üzgüçülük hovuzu, futbol meydançası, üstü örtülü oyun zalı və tennis kortunun tikintisi nəzərdə tutulub. A. Rəhimov onu da bildirib ki, Mingəçevirdə avarçəkmə üzrə ən böyük baza təhvil veriləcək. Onun sözlərinə görə, bu işlərin görülməsi üçün dövlət büdcəsindən 2008-ci ildə 104 milyon manat vəsait ayrılıb. Gələn il isə təxminən 100 milyon manat vəsait ayrılması nəzərdə tutulub.
A. Rəhimov qeyd edib ki, gələn il ərzində ölkə üzrə 7 olimpiya idman kompleksi təhvil veriləcək. Bundan başqa, Şirvan şəhərində Olimpiya İdman Kompleksinin, Göygöl və Yardımlı rayonlarında isə idman zallarının inşası nəzərdə tutulub.