Bu gün qadın voleybolçular üzrə ölkə çempionatının XI turunun 2 oyunu baş tutub. Apasport.az saytının məlumatına görə, eyni sponsordan maliyyələşən komandaların duelində “Azəryol” “Azərreyl”i qəbul edib.

Gərgin keçən görüşdə “Azəryol” hesabda 2:0 öndə olsa da, “dəmiryolçular” tarazlığı bərpa edə bilib. Ancaq təcrübə sonda öz sözünü deyib və “Azəryol” matçdan qalib ayrılıb.

Günün digər qarşılaşmasında "İqtisadçı" "Lokomotiv"lə üz-üzə gəlib. Hesabat turunda “Azəryol”a “quru hesabla” uduzan “tələbələr” bu dəfə çətinliklə də olsa 2 xal qazanıblar.

Beləliklə, bu oyunlardan sonra turnir cədvəlində dəyişiklik olmayıb. Turnir cədvəlinə rəqiblərindən 1 oyun az keçirən “Rabitə” başçılıq edir. “Azəryol” ikinci, “İqtisadçı” üçüncü yerdədir.

10 mart
XI tur
Azəryol – Azərreyl 3:2 (25:13, 25:20, 19:25, 23:25, 15:13)

İqtisadçı - Lokomotiv 3:2 (25:20, 19:25, 23:25, 25:23, 15:11)

Qeyd edək ki, martın 15-16-da keçiriləcək “Dördlər finalı” ilə bağlı XI turun “Rabitə” – “Telekom” görüşü təxirə salınıb.