Millimizin sabiq müdafiəçisi Rail Məlikovun yeni klubu olan “Dənizlispor”da heyətə düşə bilməməsinin səbəbinə aydınlıq gəlib. Apasport.az saytının əldə etdiyi məlumata görə, 28 yaşlı futbolçu ayağındakı zədəsindən əziyyət çəkir.

Futbolçu avqustun 7-də sabiq klubu “Dənizlispor”la 1 illik müqavilə bağlasa da, son 2 turda “18-liy”ə daxil edilmir. Bunun səbəbi isə ötən ilin avqustun 31-də “Qəbələ”nin “Xəzər Lənkəran”la oyununda Railin ayağından ciddi zədələnməsidir. Həmin vaxt 4-5 aylığa kollektivdən ayrı düşən Məlikov bir də bu ilin martın 19-da ölkə kubokunda 1/4 finalın cavab matçı olan “Qarabağ”la görüşdə (2:1) meydana çıxmışdı. Rail indi məhz həmin zədəsini Türkiyədəki məşqlər zamanı yeniləyib.

Qeyd edək ki, “Dənizlispor” Türkiyənin I dəstəsində uduzmayan 5 komandadan biridir. “Xoruzlar” 1 qələbə və 2 heç-heçə ilə turnir cədvəlinin V pilləsində qərarlaşıb. Rail Məlikovun sabah Türkiyə kubokunda “Sebat Proje Trabzon Akçaabat”a qarşı oynayacağı gözlənilir.