Bakı. Aqşin Əliyev-APA-Sport. Sabah Almaniyanın Köln şəhərində qadınlar arasında otüstü hokkey üzrə Avropa Klub Çempionları Kuboku başlanacaq. “APA-Sport” agentliyinin məlumatına görə, bu yarışda Azərbaycanı “Atasport” təmsil edəcək. Otüstü hokkeyçilərimiz ilk turda Rusiyanın “Volqa Telekom” klubunu sınağa çəkəcəklər. Ancaq ötən turnirlərdən fərqli, “Atasport” rusiyalılarla görüşə baş məşqçisiz çıxacaq. Buna pakistanlı baş məşqçi Tahir Zamanın viza problemi ucbatından Almaniyaya yollana bilməməsi səbəb olub. Onun həmyerlisi Zahid Əli də viza ala bilmədiyi üçün səfərə çıxmayıb. Belə olan halda, Azərbaycan Otüstü Hokkey Federasiyasının rəhbərliyi komandanı hollandiyalı Herald Hyubenə tapşırıb. O, apreldə Bakıda keçirilmiş lisenziya xarakterli beynəlxalq turnirdə yığmamıza da məşqçilik edib. H.Hyubenin rəhbərliyi altında “Atasport”, həmçinin mayın 10-da “Siaulay” (Litva), ertəsi gün isə “Hertogenboş”a (Hollandiya) qarşı mübarizə aparacaq. Komandamız turnirin qalibi olmaq üçün ilk növbədə qrup mərhələsini birinci pillədə başa vurmalıdır. Mayın 12-də yekunlaşacaq yarışın reqlamentinə əsasən, ən zəif nəticə göstərən iki kollektiv Avropa Klub Çempionları Kubokunda yerini itirəcək.

• Polad Rzayev Avstriyada beynəlxalq turnirində çıxış edəcək
• “İdman həftəsi” çərçivəsində keçirilən bilyard çempionatı başa çatıb
• MOK-un İcraiyyə Komitəsinin yeni tərkibdə növbəti iclası keçirilib
• Formula 1: Azərbaycan Qran Prisi 2025-ə marşal qeydiyyatı başladı - FOTO
• Polad Rzayev ölkəmizi paralimpiyanın dağ xizəyi növündə təmsil edəcək