Bakı. Elşən Məmmədov – APA-Sport. Türkiyə milli komandası iyunun 20-də Xorvatiya yığmasına qarşı keçirəcəyi futbol üzrə Avropa çempionatının ¼ final matçı öncəsi itkilərlə üzləşib. «APA-Sport» agentliyinin məlumatına görə, Çexiya ilə qrup mərhələsinin son oyununda 3:2 hesablı əzmkar qələbə «ay-ulduzlular»a baha başa gəlib. Bu matçda qırmızı vərəqə alan qapıçı Volkan Dəmirəl və ikinci sarı vərəqə aldığı üçün cəzalı duruma düşən yarımmüdafiəçi Mehmet Aurelio növbəti görüşü buraxacaqlar. Müdafiəçi Əmrə Güngör isə aldığı xəsarət üzündən bir daha qitə birinciliyində forma geyməyəcək. Çexiyaya qarşı zədəli halda çıxış etmiş daha bir müdafiəçi Sərvət Çətinin sol dizindəki ağrılar güclənib. Həkimlər onun Xorvatiya ilə görüşdə iştirak edib-etməyəcəyi haqda qərarı oyun günü verəcəklər. Hələ İsveçrə ilə matçda zədəli halda çıxış etmiş yarımmüdafiəçi Tümər Mətinin qasıq nahiyəsindəki ağrılar üzündən qarşıdakı oyunu buraxma ehtimalı böyükdür.
Qeyd edək ki, Avstriyanın paytaxtı Vyanada keçiriləcək Xorvatiya – Türkiyə matçı Bakı vaxtı ilə saat 23:45-də başlanacaq.

• “Ocaq kuboku”nun təqvimi bəlli oldu
• Badmintonçularımız Uqandada “gümüş” qazandı
• Qubada ilk mükafatçılar bəlli oldu
• Snayperlərimiz dünya çempionatında
• AMADA təlim keçirib