Bakı. Kənan Həsənov - APA-Sport. Rusiyanın Soçi şəhərində təşkil olunan şahmat üzrə Qran-Pri turnirinin ikinci mərhələsi çərçivəsində VI turun oyunları keçirilib. “APA-Sport” agentliyinin məlumatına görə, hesabat turu Azərbaycan milli komandasının üzvləri üçün uğurlu alınıb. Liderlər qrupunda qərarlaşan Teymur Rəcəbov ardıcıl ikinci qələbəsini Boris Qelfand (İsrail) üzərində qazanıb. Qara fiqurlarla oynayan qrossmeysterimiz rəqibini 49-cu gedişdə məğlub edib. Vüqar Həşimov isə ağ fiqurlarla 70-ci gedişdə David Navaranın (Çexiya) müqavimətini qırıb. Bu, həmyerlimizin ardıcıl beş heç-heçədən sonra ilk qələbəsi olub. İvan Çeparinov (Bolqarıstan) rusiyalı Aleksandr Qrişuku, Levon Aronyan (Ermənistan) isə qətərli Məhəmməd Əl Modiakini üstələyib. Dmitri Yakovenko (Rusiya) - Vasili İvançuk (Ukrayna), Qata Kamski (ABŞ) - Sergey Karyakin (Ukrayna), Pyotr Svidler (Rusiya) – Van Yue (Çin) görüşlərində qalib müəyyənləşməyib. Altı oyundan sonra turnir cədvəlinə 4 xalla T.Rəcəbov və İ.Çeparinov başçılıq edir. Onların ən yaxın izləyiciləri hərəyə 3,5 xal toplayan V.Həşimovla L.Aronyandır. Bu gün VII turun oyunları keçiriləcək: V.Yue - İ.Çeparinov, A.Qrişuk - B.Qelfand, D.Navara - P.Svidler, V.İvançuk - V.Həşimov, L.Aronyan - D.Yakovenko, T.Rəcəbov - Q.Kamski, S.Karyakin - M.Ə.Modiaki.

• İdmançımız İtaliyada 2-ci oldu
• Gimnastlarımızdan bürünc medal
• Səbinə Əliyeva Türkiyədə çıxış edib
• Azərbaycanlı məşqçi Hindistanda keçirilən düşərgədə iştirak edib
• Kros qaçışı üzrə Bakı şəhər payız çempionatı keçiriləcək