Azərbaycanın mərhum prezidenti Heydər Əliyevin xatirəsinə həsr olunmuş şahmat üzrə “Prezident kuboku” turniri bu gün start götürüb. Apasport.az saytının məlumatına görə, “ÜNS” yaradıclıq səhnəsində təşkil olunan yarışda Azərbaycan və dünya yığmaları üzə-üzə gəlirlər.

Açılış mərasimində Azərbaycan Şahmat Federasiyasının prezidenti Elman Rüstəmov, gənclər və idman naziri Azad Rəhimov, FİDE prezidenti Kirsan İlyumjinov və digər qonaqlar iştirak ediblər. Tədbirdə Rüstəmov, İlyumjinov çıxış edərək, ölkəmizdə şahmatın inkişafından danışıblar, “Prezident kuboku”nda mübarizə aparan idmançılara uğurlar arzulayıblar.

Bədii hissədən sonra dünya çempionu Vişvanatan Ananda Rusiyanın nüfuzlu “64 – şahmat icmalı” jurnalı tərəfindən “Oskar” mükafatı təqdim olunub. Ardından turnirin püşkü atılıb. Püşkatmada yarışın baş hakimi Faiq Həsənov, dünya yığmasından Vişvanatan Anand, milli komandamızdan isə Teymur Rəcəbov iştirak edib. Nəticədə ağ fiqurlar bizim, qaralar isə rəqib komandanın bəxtinə çıxıb. Bu isə o deməkdir ki, birinci turda yığmamızın bir və üç nömrəli üzvləri ağ fiqurlarla oynayacaqlar.

İlk turda Teymur Vişvanatan Anandla (Hindistan), Vüqar Həşimov Vladimir Kramniklə (Rusiya), Şəhriyar Məmmədyarov Aleksey Şirovla (İspaniya), Qədir Hüseynov isə Sergey Karyakinlə (Ukrayna) mübarizə aparır. Artıq partiyalar start götürüb.

• Üzgüçümüz Sofiyada qızıl medal qazanıb
• İdmançılarımız Avropa Yay Olimpiya Festivalına hazırlaşırlar
• AzVİF-lə Elm və Təhsil Nazirliyinin əməkdaşlığı çərçivəsində yeni layihəyə start verilib - FOTO
• Azərbaycan və Polşa arasında antidopinq sahəsində əməkdaşlığın perspektivləri müzakirə olunub
• Millidən yeni rekord: Yığma dünya reytinqində 27-ci sıraya yüksəlib