Azərbaycanı Yay Olimpiya Oyunlarında təmsil edəcək idmançılar turnirin keçiriləcəyi Londona bu gün yollanırlar. Apasport.az saytının məlumatına görə, olimpiyaçılarımızı yola salan maşın karvanı səhər saatlarında Gənclər İdman Nazirliyi, Milli Olimpiya Komitəsinin binasının qarşısından Heydər Əliyev Beynəlxalq Hava Limanına yollanıb. Artıq ora yetişən nümayəndə heyətimiz gözəl ab-hava, böyük izdiham, musiqi sədaları ilə qarşılanıb. Hava limanına toplaşan insanların əllərində “Londona fərəhlə, geriyə qələbə ilə”, “Bizə qələbə yaraşır”, “Olimpiya zirvəsini fəth edək” kimi şüarlar olan plakatları görmək mümkündür.

Bu, Londona yollanacaq olimpiyaçılarımızın ilk hissəsidir və 32 nəfərdən ibarətdir. İlk olaraq boksçular, üzgüçülər, qılıncoynadanlar, atletlər, cüdoçular və ağır atletlər səfərə çıxırlar. Digər 3 səfər iyulun 26-da, avqustun 2-də və 4-də olacaq və ümumilikdə lisenziyaçılarımızın sayı 53 nəfərdir.

Londondakı turnir iyulun 27-də start götürəcək və ilk olaraq mübarizəyə başlayan idman növlərindəki təmsilçilərimiz əvvəlcə yola düşürlər. Nümayəndə heyətində olimpiya çempionlularımızdan Zemfira Meftahəddinova, Nazim Hüseynov, Rəfiqə Şabanova, Lyudmila Şubina yer alıb. Yola salanlar arasında olimpiya mükafatçılarından bürünc medal qazanan boksçular Şahin İmranovla Fuad Aslanov, paralimipiya çempionu İlham Zəkiyev, müxtəlif federasiyaların rəsmiləri olub. Gənclər və İdman Nazirliyinin, Milli Olimpiya Komitəsinin rəhbərliyi də olimpiyaçılarımızın yanında olaraq, xatirə şəkli çəkdiriblər. Nümayəndə heyətimizi aparan təyyarə saat 13:30-da havaya qalxacaq.

Qeyd edək ki, akademik avarçəkənlərimiz Natalya Mustafayeva və Aleksandr Aleksandrov artıq Londonda olaraq, məsul turnirə son hazırlıqlarını keçirirlər.

• Təhminə Tağızadə: "Bakı 2026-cı il üçün dünyanın idman paytaxtı seçilib"
• AMADA-nın təşkilatçılığı ilə Bakıda beynəlxalq konfrans keçirilib
• AMADA beynəlxalq konfrans keçirəcək
• AMADA-nın təşkilatçılığı ilə dəyirmi masa keçirilib
• Sumqayıtda Uşaq Paralimpiya Oyunları keçiriləcək