Serbiyada güləş üzrə Fərdi Dünya Kubokunda üçüncü yarış gününə yekun vurulub.

Apasport.az saytının məlumatına görə, yunan-Roma güləşçiləri ikinci medal günündə son 5 dəst mükafatın sahibini müəyyənləşdiriblər.

Azərbaycan millisinin iki güləşçisi də həlledici görüşə çıxıb. Təmsilçilərimizdən Taleh Məmmədov təsəlliverici qarşılaşmada Mateuş Şevçuka (Polşa) 10:2 hesabı ilə qalib gəlsə də, bürünc medal uğrunda mübarizədə Kali Süleymanova (Qırğızıstan) uduzub – 6:7. 

Ondan fərqli, Beka Kandelaki (130 kq) çıxışını medalla başa vurub. 3-cü yer uğrunda Rafal Krayevski (Polşa) ilə güləşən milliləşdirilmiş idmançı 9:0 hesablı qələbə sayəsində fəxri kürsüyə yüksəlib. O, bürünc medala yiyələnib. 

Beləliklə, yunan-Roma güləşi üzrə Azərbaycan millisi Fərdi Dünya Kubokunu 3 mükafatla bitirib. Kandelakidən öncə komandamızın heyətində İslambek Dadov (67 kq) gümüş, Eldəniz Əzizli (55 kq) bürünc medala sahib olub. 

Qeyd edək ki, yarışda bu gün qadın güləşçilərin mübarizəsinə də start verilib. Millimizin üzvlərindən Tatyana Omelçenko (62 kq) Lidiya Peresi məyus edərək 1/4 finala yüksəlsə də, ardınca Lyubov Ovçarovaya (Rusiya) uduzub. 

• Azərbaycan Kamandan Oxatma Federasiyasında idmançılara yeni idman dərəcələri təqdim edilib
• Qaşım Maqomedov: "Bu medal mənim üçün böyük əhəmiyyət kəsb edir"
• Yenilənmiş Olimpiya medalları idmançılarımıza təqdim edilib
• “Azərbaycan Qolf Federasiyası” İctimai Birliyinin yığıncağı keçirilib
• Velosipedçilərimiz beynəlxalq “Tour of Mersin” yarışına qatılıblar