Bu gün Çinin Tsindao şəhərində “Masters” turnirinə start verilib.
Apasport.az saytının məlumatına görə, dünyanın ən güclülərinin qatıldığı yarışın ilk günündə 5 çəki üzrə qaliblər müəyyənləşəcək.
Azərbaycan millisi bunlardan ikisində 4 cüdoçu ilə mübarizəyə qoşulub. Yarış təmsilçilərimiz üçün uğursuz başlayıb və ilk gün komandamız üçün vaxtından əvvəl başa çatıb.
Kişilər
66 kq
Millimizin liderlərindən Orxan Səfərov yarışa 1/16 final mərhələsindən qatılıb. İlk cəhdində ukraynalı Georgi Zantariya ilə üz-üzə gələn cüdoçumuz mərhələ adlaya bilməyib.
İlk mərhələdən azad olan Nicat Şıxəlizadə 1/16 finalda Boqdan Yadova (Ukrayna) qalib gəlsə də, ardınca Xerlan Qanboldla (Monqolustan) bacarmayıb.
Qadınlar
48 kq
Leyla Əliyevanın debütü uğurlu alınıb. O, Çen-Hao Lini (Çin Taypeyi) məğlub edərək, 1/8 finala yüksəlib. Lakin bu mərhələdə monqolustanlı Urantsetsev Munxbat təmsilçimizdən üstün olub.
Bu çəkidə digər təmsilçimiz Aişə Qurbanlı isə 1/16 final çərçivəsində fransalı Melani Klementə uduzub.
Qeyd edək ki, dekabrın 14-də başa çatacaq yarışda Azərbaycan yığması 11 cüdoçu ilə təmsil olunur.