“Qarabağ”ın veteran futbolçusu Emin İmaməliyev apasport.az saytına müsahibə verib.
- “Qarabağ” sabah “Lion” önünə çıxacaq. Azərbaycan çempionunun bu matçdakı şanslarını necə dəyərləndirirsən?
- "Qarabağ"ın "Lion"la matçda qələbə qazanmaq şanslarının yüksək olduğunu düşünürəm. Məncə, elə Fransa klubunu məğlub edə bilərik. Fikrimcə, "Qarabağ" "Lion" üzərində layiqli qələbə qazanacaq. Özü də, yaxşı oyunla.
- “Qarabağ”ın “Bodo Qlimt” üzərində qələbəsindən sonrakı periodunu necə görürsən? Komanda Premyer Liqada da uğurlu çıxışına davam edir...
- "Qarabağ"a "Lion"la matçda uğurlar arzulayıram. Əlbəttə ki, "Bodo-Qlimt"lə oyundan sonra "Qarabağ" özünəinamı geri qaytarıb. Söhbət avrokuboklardan gedir. Norveçdə də vacib qələbə qazandılar. "Qarabağ" Norveçdəki qələbədən sonra şanslarını saxladı. Bu mənada, “Lion”la görüşə inamlı çıxacaqlar. Təbii ki, rəqib də yaxşı komandadır. Amma mən “Qarabağ”a inanıram.
- Ağdam klubunda Marko Veşoviç və Marko Yankoviç də sıraya qayıdıb. Demək olar ki, kadr problemi yoxdur. Ümumiyyətlə, əvvəlki avrokubok matçlarında Veşoviçin olmaması nə dərəcədə təsir etmişdi?
- Əlbəttə ki, bütün oyunçuların heyətdə olması böyük üstünlükdür. “Qarabağ”da kadr problemi yoxdur. Bu, əladır. Allah qoysa, “Qarabağ” evdə öz azarkeşləri qarşısında yaxşı oynayaraq, aktivinə növbəti üç xalı yazdıra bilər.
- Azərbaycan çempionunu ən azından pley-off qrupundan bir xal ayırır. Yəqin ki, onların bu nəticəyə imza atacağına inanırsan?
- Hər şey “Qarabağ”ın öz əlindədir. Komandamızın pley-off mərhələsinə çıxacağına çox inanıram. Onlar bunu oyunları ilə göstərir. “Lion”un son oyunlarını nəzərə alsaq, pis təsir bağışlamır. Sadəcə problemləri varsa, ondan da istifadə edib, evdə onları məğlub etmək olar. “Qarabağ”a bir daha uğurlar arzulayıram. İnanıram ki, “Lion”la matçda gözəl oyunla, gözəl qələbə qazanacaq.
- Səncə, təmsilçimiz yeni formata çətin adaptasiya oldu?
- Yeni format bütün klublar üçün eynidir. Düzdür, kim necə adaptasiya olur, kim necə hazır olursa, o da o cür oynayır. Yeni formatda pley-off mərhələsinə vəsiqə qazanmaq o qədər də çətin deyil. Özünə uyğun rəqibləri üstələməlisən ki, ən azından 9-10 yığasan. Bu qədər xal yığanda, pley-off mərhələsinə çıxırsan. İnanıram ki, “Lion”u məğlub etdikdən sonra, bir oyunda da qalib gəlib “Qarabağ” pley-off mərhələsinə vəsiqəni təmin edər.
Oxşar xəbərlər
Ana səhifə
Bütün xəbərlər
Hesabım