Bu gün Azərbaycanın peşəkar futbol klubu "Neftçi"nin yaranma günüdür.
Apasport.az xəbər verir ki, ölkənin ən köklü klubu 88 yaşını tamamlayır.
Bakı təmsilçisi 1937-ci ilin martın 18-də "Neftyanik" adı ilə fəaliyyətə başlayıb. Uzun müddət SSRİ çempionatında çıxış edən komanda dəfələrlə uğurlara imza atıb. 1966-cı ildə əfsanəvi Anatoli Banişevskinin də iştirak etdiyi komanda bürünc medallara sahib çıxıb.
1968-ci ildə isə klubun adı "Neftçi" olaraq dəyişdirilib. 1992-ci ildən keçirilən Azərbaycan çempionatlarının daimi iştirakçısı olan "ağ-qaralar" 9 dəfə ölkə çempionu olub - 1992, 1995/96, 1996/97, 2003/04, 2004/05, 2010/11, 2011/12, 2012/13, 2020/21.
Klub həmçinin 6 dəfə Azərbaycan kubokunun qızıl medallarına sahib çıxıb - 1994/95, 1995/96, 1998/99, 2003/04, 2012/13, 2013/14.
"Neftçi" ölkə futbolu tarixində avrokubokların qrup mərhələsinə vəsiqə qazanan ilk klub olub. Bakı təmsilçisi 2012/13 mövsümündə Avropa Liqasının qrup mərhələsinə yüksəlib. Komanda Çempionlar Liqasının II təsnifat mərhələsində "Zestafoni"ni (Gürcüstan) mübarizədən kənarlaşdırıb. Növbəti turda İsrail "Hapoel"inə uduzan "Neftçi" Avropa Liqasının pley-off mərhələsinə vəsiqə qazanıb. Bakıda APOEL-lə 1:1-lik heç-heçə edən komanda Cənubi Kiprdə rəqibini 3:1 hesabı ilə məğlub edib. Bununla da, Azərbaycan futbolunda yeni səhifə açılıb.
"Neftçi" əsas mərhələdə "İnter" (İtaliya), "Rubin" (Rusiya) və "Partizan"a (Serbiya) rəqib olub.
"Ağ-qaralar" bir dəfə də beynəlxalq turnirin çempionu olub. Komanda 2006-cı ildə Latviyada keçirilən Birlik Kubokunda qızıl medallara sahib çıxıb. "Neftçi" "Şaxtyor" (Ukrayna), "Şerif" (Moldova), ÇSKA (Rusiya) kimi klubların yer aldığı turnirdə ən güclü adına yiyələnib.
Oxşar xəbərlər
Ana səhifə
Bütün xəbərlər