Misli Premyer Liqasının III turunda "Qarabağ" səfərdə "Karvan-Yevlax" klubunu 2:0 hesabı ilə məğlub edib.
Apasport.az xəbər verir ki, matçdan sonra Ağdam klubunun baş məşqçisi Qurban Qurbanov mətbuat konfransında oyunla bağlı danışıb. Daha sonra isə jurnalistlərin suallarını cavablandırıb:
"Futbolçularımı təbrik edirəm. Asan qələbə olmadı. Belə şəraitdə, belə meydançada futbolçuları motivasiya etmək asan deyil. Lakin yenə də bacardılar. Bizim üçün vacib oyun idi. Futbolçularıma təşəkkür edirəm. Xeyli azarkeşimiz var idi. Onlara da minnətdaram. Azər Haşımova uğurlar arzulayıram. Yeni komanda ilə Premyer Liqada işitrak edirlər. Əvvəlki oyunları da çox yaxşı səviyyədə keçirmişdilər. Bu gün də, çox yaxşı oyun qurmuşdu, xeyli sayda təhlükəli epizod da yaratdılar. Get-gedə də daha da yaxşı kollektiv və daha yaxşı nəticələri olacaq".
- "Benfika" ilə oyuna hazırlaşan "Qarabağ" üçün "Karvan-Yevlax"la matça köklənmək çətin deyilki?
- Düzü, hələ o oyuna hazırlaşmaq barədə düşünmürdük. Sadəcə "Karvan-Yevlax"la matçı fikirləşirdik. Avrokubok matçından, o atmosferdən çıxıb, bu gün belə şəraitdə oynamaq var idi. Ona görə dedim ki, futbolçuları oyuna motivasiya etmək asan deyildi. Amma illərdir ki, belə hallar olur. Çox istəyərdik ki, daha yaxşı meydançada, daha çox azarkeş olsun. Bu iki amil futbolçular üçün çox önəmlidir. İstirahətdən sonra "Benfika" ilə oyuna hazırlaşacağıq.
- Kamilo Duran debüt etdi, amma Dani Montiel hələ ki görməmişik. Onun durumu necədir?
- Burada elə bir ciddi problem yoxdur. Sadcə hazır deyil. Altı aydan çoxdur ki, komanda ilə məşq etməmişdi, fərdi hazırlaşmışdı. Hələ idman formasından uzaqdır. Düzdür, kollektivlə məşqlərə qoşulub. Amma hələ bu cür oyunları oynayacaq gücdə deyil. Daha da çox vaxt lazım olacaq. Çemionata verilən fasilədə inanıram ki, özünə yavaş-yavaş gələcək. Qarşıdakı matçlarda ilk dəqiqələrdən yox, sonradan oyuna çıxmaq şansı olacaq.
- Son günlərdə "Neftçi"nin "Qarabağ"ı ÇL-in əsas mərhələsinə düşməsi münasibəti ilə təbrik etməməsi müzakirə edilir. Sizə görə, "Neftçi" tərəfinin "Qarabağ"ı təbrik etməməsi düzgündür?
- Samir həmişə telefonla təbrik edir. Elçin müəllimlə həmişə əlaqə saxlayır. Bütün oyunlarda zəng edib, təbrik edir. Düzünü desəm, bu məsələyə ciddi də yanaşmamışdım. Amma hər klubun da öz yanaşması var. Bu gün buna görə "Neftçi"dən incidim deyə, bir şey yoxdur. Hərənin yanaşması, hər bir klubun idarə edilməsi fərqlidir. "Neftçi" hamımızın "Neftçi"sidir, Samir bizim dostumuzdur, rəhbərlik də bizim dostlarımızdır. Çox yaxşı münasibətlərimiz var. Rəhbərlikdən də oyundan sonra şəxsən mənimlə əlaqə saxlayanlar çox olub, təbrik ediblər. Rəsmi, yazılı formada olmayıb, bunu ciddiyə də almıram.
- Samba Sumano və Juninyonun "Qarabağ"a keçidi məsələsi nə dərəcədə doğrudur?
- Bəli, danışıqlar gedir. Biz tərəfimizdən ciddi təklif də olub. Ola bilər ki, biz Çempionlar Liqasının əsas mərhələsinə düşdük deyə, qarşı tərəf ola bilər ki, daha çox yuxarıdan getməyə başladı. Biz də danışıqlar aparırıq. Vaxtımız azdır. Hər bir halda, son dəqiqəyə qədər danışıqlar gedəcək. Birdən-birə danışıq çox çətinləşməyə başladı.
- Çempionlar Liqasının təqvimindən razısız?
- Normaldır. Əsas mərhələdir, bir deyim var keçəl Həsən, Həsən keçəl ikisi də eynidir.
- Legioner limitinin ləğvi Azərbaycan futboluna nə verdi, nə aldı?
- Fikir bildirmək tezdir. Çempionatın gedişatında baxacağıq. Komandalar da keçən mövsümə nisbətən bəlkə daha da ciddiləşib, daha da fərqli olub.
Oxşar xəbərlər
Ana səhifə
Bütün xəbərlər