“Rabitə” oynamadan da çempion ola bilər!

13.04.2012 - 10:13

Bu gün qadın voleybolçular arasında Azərbaycan Super Liqasının final mərhələsində VIII turunun oyunları keçiriləcək. Apasport.az saytının məlumatına görə, “Rabitə” istirahət etdiyi turda belə, çempion ola bilər.

Bunun üçün günün hər 2 oyununda dünya çempionuna sərf edən nəticələr qeydə alınmalıdır. Turun ilk “İqtisadçı” – “Azərreyl” matçında birincilər istənilən hesabla uduzmalıdırlar. Belə ki, universitet komandası 2 və ya 3 xal itirdiyi halda, lider “Rabitə” onlar üçün əlçatmaz olacaq. Çünki liderin hər 2 matçda uduzacağı halda “İqtisadçı”nın onlara çatması üçün 3 görüşə 8 xal qazanmalıdır. İstənilən məğlubiyyət isə bunu mümkünsüz edir.

Digər - “Lokomotiv” – “Bakı” görüşündə üz-üzə komandaların isə hər 2-si “Rabitə”yə çata bilər. Lakin “İqtisadçı”dan fərqli, onlar ümumiyyətlə xal itirməməli və son çempionların “quru hesabla” məğlubiyyətlərini gözləməlidirlər. Bu günki matçda hər 2 klubun xal itirməsi isə həm “Lokomotiv”, həm “Bakı”nın “Rabitə”yə çatmaq arzularının üstündən xətt çəkəcək. Yəni çempionun bu 2 komandaya əlçatmaz olaması üçün günün ikinci qarşılaşmasında 5 set oynanılmalıdır.

Bir sözlə, turun ikinci oyununda hər hansı klub 3:2 hesabı ilə qalib gələrsə, yəni tay-brekə ehtiyac olarsa və günün ilk oyununda da “Azərreyl” qalib gələrsə, “Rabitə” vaxtından əvvəl birinci yeri özü üçün təmin edəcək.